Ikipe ya Dynamo BBC yo mu Burundi yatewe mpaga ya kabiri ihita ikurwa mu irushanwa rya Basketball Africa League (BAL), nyuma yo kwanga kuva ku izima ngo yambare umwambaro uriho ikirango cya ‘Visit Rwanda’.
Ubuyobozi bwa BAL kuri uyu wa Kabiri tariki ya 12 Werurwe 2024, bwatangaje ko iyi kipe yatewe mpaga ya kabiri mu mukino wari kuyihuza na Petro Atlético de Luanda.
Ati “Dynamo Club (Burundi) yakomeje kudakurikiza amategeko ya Basketball Africa League bigendanye n’imyambaro n’impuzankano zagenwe, bityo rero yahise iterwa mpaga ku mukino w’uyu munsi wagombaga kuyihuza na Petro de Luanda (Angola) ndetse ikurwa no mu irushanwa.”
Amategeko ya BAL avuga ko ikipe itewe mpaga ebyiri igomba guhita isezererwa muri iri rushanwa ako kanya. Yahise iba ikipe ya mbere ikuwe mu irushanwa.
Si ibyo gusa kuko iyi kipe ishobora no guhita ihagarikwa muri iyi mikino ihuza ibigugu byo muri Afurika mu myaka itanu iri imbere no kwishyura amande y’ibihumbi 500$.
Iyi kipe kandi yari yitabiriye ku nshuro ya mbere ihagaritswe nyuma y’itangazo ry’Ishyirahamwe rya Basketball i Burundi (FEBABU) ribuza abakinnyi kutarenga ku mategeko igihugu cyabahaye agendanye n’imyambarire.
Igiye gutaha mu gihe yari yatangiye iryo rushanwa neza kuko mu mukino ufungura iyi mikino wabaye ku wa Gatandatu tariki 9 Werurwe yatsinze Cape Town Tigers amanota 86-73.
Hagiye gushira imyaka ine Visit Rwanda isinyanye amasezerano y’ubufatanye y’igihe kirekire n’irushanwa rya Basketball Africa League riterwa inkunga na NBA ndetse kuva icyo gihe imikino ya nyuma ibera i Kigali.
The following has been announced by BAL President Amadou Gallo Fall: pic.twitter.com/fQshVlLqzC
— Basketball Africa League (@theBAL) March 12, 2024
