Iyi mikino izitabirwa n’amakipe ane ariyo APR BBC (Rwanda) na Rivers Hoopers (Nigeria) zigiye gukina iki cyiciro ku nshuro ya mbere, AS Douanes (Sénégal) na US Monastir (Tunisia).
Muri iyi nkuru tugiye kugaruka ku byo wamenya ku makipe ari muri iri tsinda ndetse n’ibyo kuryitegamo.
AS Douanes
Association Sportive des Douanes izwi nka AS Douanes ni ikipe y’ubukombe muri Sénégal yashinzwe mu 1980. Niyo imaze kwegukana ibikombe byinshi muri iki gihugu aho ibifite ibigera kuri 35. Muri byo harimo 11 bya Shampiyona na birindwi by’igihugu ndetse n’ibindi.
AS Douanes ni imwe mu makipe yo kwitondera muri iri tsinda kuko mu mwaka ushize yatsindiwe ku mukino wa nyuma na Al Ahly yegukanye BAL 2023.
Icyakora yatakaje kizigenza wayifashije cyane muri urwo rugendo, Umunyamerika Chris Crawford. Ni mu gihe yabashije kugumana Jean Jacques Boissy watowe mu bakinnyi batanu bari bagize ikipe nziza mu irushanwa riheruka.
Si ibyo gusa kuko ikiri kumwe n’umutoza wayo Pabi Gueye wabaye Umutoza w’Umwaka muri BAL 2023.
Rivers Hoopers
River Hoopers yo muri Leta ya Rivers muri Nigeria yashinzwe mu 2005. Icyo gihe yitwaga Royal Hoopers itarahindurirwa izina mu 2016 n’Ubuyobozi bwa Leta ya Rivers bwahise bunayifata mu nshingano.
Iyi kipe imaze kwegukana Igikombe cya Shampiyona inshuro eshanu (2011, 2012, 2019, 2021na 2023). Ni mu gihe ari ku nshuro ya kabiri yitabiriye BAL nyuma ya 2021.
Muri uyu mwaka yashyizemo imbaraga zikomeye kugira ngo izagere mu mikino ya nyuma izabera i Kigali. Mu bakinnyi batanu bashya yaguze barimo William Perry umaze kubaka izina muri iri rushanwa ariko Abanyarwanda baramuzi cyane kuko muri uyu mwaka yakinaga muri Patriots BBC.
Perry yiyongeraho abandi nka John Wilkins, Devine Eke, Peter Olisemeka na Kelvin Amayo.
US Monastir
Union Sportive Monastirienne izwi nka US Monastir ni ikipe yashinzwe mu 1923 mu mujyi wa Monastir muri Tunisia. Ni ikipe y’ubukombe muri iki gihugu, aho imaze kwegukana Igikombe cya Shampiyona inshuro zirindwi n’Igikombe cy’Igihugu inshuro enye.
Niyo kipe ya mbere yo muri Tunisia yegukanye Basketball Africa League (2022). Umwaka wakurikiye ntabwo yabashije kugera mu mikino ya nyuma, bityo muri uyu ikaba yifuza gusubira aho yahoze.
Mu rwego rwo kongeramo imbaraga, iyi kipe yongeye kugura Chris Crawford wayinyuzemo mu 2021. Kugeza ubu, uyu mukinnyi niwe umaze gutsinda amanota menshi (341) mu mateka ya BAL.
APR BBC
Ni ku nshuro ya mbere iyi kipe y’ubukombe mu Rwanda yitabiriye iri rushanwa riri gukinwa kuya kane. Ikipe y’Ingabo imaze kwegukana Igikombe cya Shampiyona inshuro umunani.
Mu rwego rwo kwitegura neza iyi mikino iyi kipe yaguze abakinnyi benshi barimo Abanyamerika Adonis Filer, Dario Hunt na Noel Obadiah.
Hari kandi Umunya-Misiri, Abdullah Abdallah ndetse n’Abanyarwanda beza nka William Robeyns, Nshobozwabyosenumukiza Jean Jacques Wilson, Ntore Habimana, Axel Mpoyo, Manzi Dan Kimasa na Chris Ruta.
Muri rusange iri tsinda rizakinwa n’abakinnyi 52 baturutse mu bihugu 11 byo ku migabane itandukanye y’isi.
Bitandukanye n’imyaka ishize, kuri iyi nshuro hazakinwa imikino ibanza n’iyo kwishyura. Mu mukino wa mbere APR BBC izahura na US Monastir tariki 4 Gicurasi, bukeye bwaho ikurikizeho Rivers Hoopers, ku ya 7 Gicurasi izakine na AS Douanes.
Amatsinda yagizwe atatu ariyo Kalahari, Nile na Sahara ndetse n’imikino ya nyuma izabera i Kigali tariki 24 Gicurasi kugeza 1 Kamena 2024.
Amakipe abiri ya mbere muri buri tsinda azabona itike y’imikino ya nyuma, mu gihe andi abiri azava mu mikino ya kamarampaka yose izabera i Kigali, ubwo hazaba hamenyekana ikipe izasimbura Al Ahly yegukanye igikombe giheruka cyangwa se ikacyisubiza.
Kugeza ubu amakipe atanu mu munani niyo amaze kubona itike yo kuzitabira imikino ya nyuma izabera i Kigali tariki 24 Gicurasi kugeza kuya 1 Kamena 2024.
Ayo ni FUS Rabat yo muri Maroc, Petro de Luanda yo muri Angola, Al Ahly yo mu Misiri, Al Ahly Benghazi na Cape Town Tigers yo muri Afurika y’Epfo.
