Iyi kipe ihagarariye u Rwanda ku nshuro ya mbere, yahuraga na US Monastir yatwaye iri rushanwa mu 2022.
Abanya-Tunisia ni bo binjiye neza mu mukino, batsinda amanota abiri, ariko APR itangira gusubiza yihuse ndetse iyobora umukino ibifashijwemo n’abarimo Noel Obadiah, Dario Hunt na William Roberyns.
US Monastir yabonaga isumbirijwe, yasabye akaruhuko irushwa amanota atanu (9-14) ubwo haburaga iminota itatu n’amasegonda 50 ngo Agace ka Mbere karangire.
Mu gusubira mu kibuga, Firas Lahyani yafashije iyi kipe yo muri Tunisia kuzamura amanota, Agace ka Mbere karangira ari 20-20.
Habura iminota itanu n’amasegonda 55 ngo Agace ka Kabiri karangire ni bwo US Monastir yongeye kuyobora umukino (28-27), amakipe yombi ajya kuruhuka harimo inota rimwe ry’ikinyuranyo (40-39).
APR BBC yakomeje kwihambira, itsindwa ku kinyuranyo cya 55-52 mu Gace ka Gatatu, mu gihe ubwo haburaga iminota itanu n’amaseginda 30 mu Gace ka Kane, yafashe US Monastir zinganya 63-63.
Kuva ubwo, umukino wakomeje kwegerana kugeza mu masegonda ane ya nyuma y’iminota isanzwe aho US Monastir yari yizeye gutsinda ifite 78-75.
Agace ka Kane k’umukino karangiye amakipe yombi anganya amanota 78-78. Hari nyuma y’uko iyi kipe ihagarariye u Rwanda yishyuye ku isegonda rya nyuma ibikesha amanota atatu ya Noel Obadiah.
Uyu Munyamerika w’imyaka 24, yigaragaje kandi no mu minota itanu y’inyongera, nk’uko byagenze no kuri Adonis Filer, APR BBC itsinda umukino ku manota 89-85.
Adonis Filer na Noel Obadiah ni bo bakinnyi batsinze amanota menshi (24) mu mukino naho uwinjije menshi ku ruhande rwa US Monastir ni Marcus Christopher Crawford watsinze 21.
Undi mukino uteganyijwe kuri uyu wa Gatandatu urahuza AS Douanes yo muri Sénégal na Rivers Hoopers yo muri Nigeria.
APR BBC izasubira mu kibuga ku Cyumweru, tariki ya 5 Gicurasi saa Kumi n’Igice, ihura na Rivers Hoopers yo muri Nigeria.
Uyu mukino uzakurikirwa n’uwa AS Douanes na US Monastir.
