00:00:00 IGIHE NETWORK KN KINYARWANDA EN ENGLISH FR FRANCAIS

US Monastir yegukanye BAL 2022 ihigitse Petro de Luanda (Amafoto)

Yanditswe na IGIHE
Kuya 29 May 2022 saa 02:58
Yasuwe :

US Monastir yo muri Tunisia yegukanye Igikombe cya Basketball Africa League [BAL 2022] itsinze Petro de Luanda yo muri Angola amanota 83-72.

Uyu mukino wabereye muri BK Arena ku mugoroba wo ku wa Gatandatu, tariki ya 28 Gicurasi 2022. Witabiriwe n’abanyacyubahiro batandukanye barimo na Madamu Jeannette Kagame, wagaragaje ko yishimiye umukino mwiza amakipe yombi yerekanye.

Na mbere y’uko umukino utangira, US Monastir ni yo yahabwaga amahirwe yo kwegukana intsinzi ariko yagowe cyane na Petro de Luanda yawuyoboye by’igihe kirekire.

Agace ka mbere k’umukino karangiye US Monastir iri imbere n’amanota 18 kuri 17 ya Petro de Luanda ariko mu ka kabiri, iyi kipe yo muri Angola ibifashijwemo na Gerson Goncalves na Carlos Morais, yigaranzura iyo muri Tunisia karangira ku manota 40 – 33.

Ikinyuranyo cyari cyashyizwemo, US Monastir yaje kugikuramo mu gace ka gatatu, isigamo amanota abiri; karangiye ari 59-57, biyiha icyizere ko ishobora kwitwara neza.

Michael Dixon watowe nk’umukinnyi w’irushanwa ari mu bafashije ikipe ye ya US Monastir kwitwara neza. Yatsinze amanota 21 muri 83 ikipe ye yatsinze Petro de Luanda yasoje ifite 72.

Uyu mukinnyi w’imyaka 31 yanatanze imipira itandatu yavuyemo ibitego, afasha ikipe ye kwegukana igikombe cya mbere cyo ku ruhande rwa Afurika mu mateka yayo.

Umwanya mwiza yigeze kubona ni uwa gatatu, hari muri 2017 FIBA Africa Champions Cup.

Dixon ni we watowe nk’umukinnyi mwiza w’irushanwa [2022 BAL Most Valuable Player].

Abandi bakinnyi bagobotse ikipe yo muri Tunisia barimo Ater Majok, Slimane Radhouane, usanzwe ari Kapiteni wa US Monastir, Firas Lahyani na Souleyman Diabate.

US Monastir itozwa na Modrag Perisic yageze ku mukino wa nyuma itsinze Zamalek muri 1/2 mu gihe Petro de Luanda y’umutoza Jose Neto yasezereye FAP yo muri Cameroun.

Zamalek ni yo yegukanye umwanya wa gatatu wakiniwe ku wa Gatanu, tariki ya 27 Gicurasi 2022, yawutsinze ku manota 97-74.

Si ku nshuro ya mbere, US Monastir yakinaga umukino wa nyuma kuko ubwo iri rushanwa ryatangiraga mu mwaka ushize, iyi kipe yatsindiwe ku mukino wa nyuma na Zamalek SC yo mu Misiri amanota 76-63.

BK Arena yakiriye imikino ya BAL 2022 guhera muri ¼ yakinwe ku wa 21-28 Gicurasi 2022. US Monastir yegukanye igikombe yabonye itike binyuze mu majonjora y’ibanze yo mu Gace kiswe ‘Sahara Conference’ yakinwe muri Werurwe 2022, yabereye muri Dakar Arena muri Sénégal.

Ku rundi ruhande, Petro de Luanda yo yanyuze muri Nile Conference, itsinda ryakiniye i Cairo mu Misiri muri Mata 2022.

Ikipe yo mu Rwanda yari muri BAL ni REG BBC yabaye iya mbere muri Sahara Conference ariko isezererwa na FAP muri ¼ rugikubita.

Intore yo mu Itorero Urukerereza ni yo yamuritse igikombe cya #theBAL yakinwaga ku nshuro ya kabiri
Itorero ry'Igihugu Urukerereza ni ryo ryasusurukije abarebye umukino wa nyuma
Umunyamerika Michael Andre Dixon Jr. ari mu bitwaye neza muri uyu mukino
Umukino wa nyuma wahuje Petro de Luanda yo muri Angola na US Monastir yo muri Tunisia
Slimane agerageza kunyura hagati y'abakinnyi ba Petro de Luanda
Madamu Jeannette Kagame mu banyacyubahiro barebye umukino wa nyuma wa BAL 2022, wahuje Petro de Luanda yo muri Angola na US Monastir yo muri Tunisia
Michael Andre Dixon w'imyaka 31 yatsinze amanota 21 mu mukino
Ni umukino wa 38 wa BAL wakinwaga muri uyu mwaka
Radhouane Slimane w'imyaka 41 ni umwe mu bagoye Petro de Luanda yo muri Angola
Modrag Perisic utoza US Monastir aha amabwiriza abakinnyi be, abereka uko bakwiye kwitwara mu kibuga
Abafana ba Petro de Luanda na bo bari bashyushye cyane
Dixon yigaruriye imitima ya benshi mu barebye uyu mukino. Byarangiye anagizwe umukinnyi mwiza w'irushanwa
Abafana ba US Monastir bari bitwaje n'amabendera ya Tunisia, aho iyi kipe ikomoka
US Monastir yo muri Tunisia yegukanye igikombe nyuma y'uko umwaka ushize yasezerewe yageze ku mukino wa nyuma
US Monastir yo muri Tunisia yegukanye Igikombe cya Basketball Africa League [BAL 2022] itsinze Petro de Luanda yo muri Angola amanota 83-72 mu mukino wabereye muri BK Arena ku wa 28 Gicurasi 2022
Monastir yegukanye igikombe cya BAL 2022 itsinze Petro de Luanda amanota 83-72
Dixon yatowe nk’umukinnyi mwiza w’irushanwa [2022 BAL Most Valuable Player]
Nubwo nta kipe yo mu Rwanda ikiri mu irushanwa ariko ubwitabire bwari hejuru, ni gihamya ko urukundo rufitiwe Baskteball rwiyongera buri munsi

Amafoto: Shema Innocent


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .