Uyu mukino wa mbere wabaye ku gicamunsi cyo ku wa Mbere, tariki 2 Nzeri 2024 muri Kaminuza ya Pretoria muri Afurika y’Epfo.

U Rwanda rwatangiye umukino neza cyane, Vanessa Prissy Camara na Nibishaka Brigitte batsinda amanota menshi. Agace ka mbere karangiye ruyoboye umukino n’amanota 25-5.

Mu gace ka kabiri, Afurika y’Epfo yagerageje kugabanya ikinyuranyo ariko ntibyaramba kuko Nibishaka yakomeje gutsinda cyane.

Igice cya Mbere cyarangiye u Rwanda ruyoboye umukino n’ikinyuranyo cy’amanota 30 (47-17).

Mu gice cya kabiri, u Rwanda rwarushijeho kongera ikinyuranyo, Nibishaka na Camara bakorerwa mu ngata na Muhawenimana Yvonne. Mu gace ka gatatu, u Rwanda rwatsinzemo amanota 29 kuri 12 ya Afurika y’Epfo.

Mu gace ka nyuma, u Rwanda rwari rwizeye intsinzi ndetse n’abandi nka Tuyisenge Vestine batsinda amanota menshi. Umukino warangiye u Rwanda rwatsinze Afurika y’Epfo amanota 102-37 rutangira intsinzi mu Gikombe cya Afurika.

Nibishaka Brigitte yakoze ibizwi nka double-double kuko yatsinze amanota 25 anakora rebounds 16.

Umukino wa kabiri, u Rwanda ruzakina na Tunisia tariki 5 Nzeri 2024.

Muri iri rushanwa, u Rwanda kandi runahagarariwe mu bahungu, aho ruzatangira rukina na Afurika y’Epfo ku wa Kabiri, tariki 3 Nzeri 2024.

Abangavu b'u Rwanda batangiye neza Igikombe cya Afurika

Afurika y'Epfo yatangiye irushanwa igaragaza urwego rwo hasi cyane

Vanessa Prissy Camara ni umwe mu bakinnyi bagize umukino mwiza cyane

Umukinnyi wa Afurika y'Epfo yageze aho yikorera amaboko