00:00:00 IGIHE NETWORK KN KINYARWANDA EN ENGLISH FR FRANCAIS

Umwihariko wa Toy Limpa umaze imyaka 24 akoropa ibibuga bya Basketball

Yanditswe na Mihigo Saddam
Kuya 30 May 2022 saa 08:58
Yasuwe :

Ku bantu bakurikiye imikino ya Basketball Africa League (BAL) iherutse kubera mu Rwanda, aho US Monastir yo muri Tunisia yatwaye Igikombe itsinze Petro de Luanda yo muri Angola ku manota 83-72, mwabonye umugabo wakundaga kujya guhanagura mu kibuga nko mu gihe umukinnyi aguye hasi cyangwa se hagati y’uduce tw’umukino.

Ni umugabo w’imyaka 40 witwa Antonio Van-Dunem uzwi nka Toy Limpa Chão, akaba akomoka muri Angola, aho amaze imyaka 24 akora aka kazi ko gukoropa ibibuga bya Basketball.

Guhanagura ikibuga byumvikana nk’ibintu bisanzwe, ariko Toy afite umwihariko kuko uretse umurava akorana akazi ke, anagira uruhare mu gususurutsa ababa bitabiriye umukino wa Basketball.

Mu bintu akora bituma atandukana n’abandi, harimo kubyina, kuryama akagendesha igihimba no gutambuka mu buryo busetsa.

Antonio Van-Dunem avuga ko yifata nk’umukinnyi wa 11 uba uri mu kibuga gikinirwamo Basketball, bityo ko nawe aba afite inshingano yo gususurutsa abaje kureba umukino.

Yagize ati “Nkora aka kazi nshyizemo imbaraga n’umutima wanjye wose. Abana banjye nibo bafana banjye ba mbere.”

Toy akundwa n’abafana, abasifuzi n’abakoresha imbuga nkoranyambanga baba mu Isi ya Basketball. Ibi ubibona iyo umupira urenze cyangwa hari ahagomba gusukurwa. Rimwe na rimwe iyo yinjiye mu kibuga wumva urufaya rw’amashyi, ubundi ukabona abafana ntibasohotse nko mu gihe cy’ikiruhuko, ahubwo bagakomeza gufana ibikorwa bye.

Uyu mugabo yavuze ko ashyira imbaraga mu gutuma umukino ukomeza vuba, ati “Nkoresha uko nshoboye nkagira vuba, nkora ibyo nkora ku buryo ntabangamira umukino. Ibirori biba bigomba gukomeza.”

Toy yatangiye aka kazi mui 1998 akorera ikipe ya ASA y’i Luanda muri Angola mbere yo kujya muri Primeiro d’Agosto ubwo yakinaga imikino y’amakipe yabaye aya mbere iwayo mu 2002.

Avuga ko icyo gihe yibwiraga ko abangamira abafana, ari nabwo yatangiye kwiga uburyo yajya ababyinira mu buryo butandukanye.

Yagize ati “Rimwe na rimwe nibazaga ko nshobora kuba ndambira abafana. Naje gutekereza uburyo najya mbabyinira kugira ngo ngumane nabo mu mukino, niyo mpamvu babona imbyino zitandukanye.”

Mu kiganiro yagiranye na FIBA, Toy avuga ko abakinnyi iteka baba bashyize ubwenge ku mukino ariko ngo bubaha cyane akazi ke.

Uyu mugabo arubatse, ndetse afite umugore n’abana barindwi. Yigeze kugira amahirwe yo kujya gukora mu mikino y’Igikombe cy’Isi cya 2019 ariko ntibyamukundira.

Gusa ngo intego ye ni ukuzakora mu marushanwa akomeye ku Isi, ku buryo umwuga yatangiye nyuma yo kudahembwa n’ikigo yakoreraga, wamugeza ku gasongero k’imikino iri ku rwego rw’Isi.

Uretse Basketball, Toy anakora aka kazi mu mikino nka Volleyball, Hockey na Handball.

Antonio Van-Dunem uzwi nka Toy Limpa Chão (Toy, the mopper) avuga ko afite intego y'igikombe cy'Isi
Antonio Van-Dunem uzwi nka Toy Limpa Chão (Toy, the mopper) aganira na Natete Brian uzwi nka MC Brian bategura ibyo bari bukore bashimisha abantu
Toy amaze imyaka 24 aretse akazi yakoraga akomeza umwuga wo guhanagura ikibuga
Imbyino za Toy ni kimwe mu bishimisha abakurikira Basketball
Toy ashobora no gukina Basketball akora ikitwa Slam Dunk
Antonio Van-Dunem uzwi nka Toy Limpa Chão (Toy, the mopper) bivugwa ko ku munsi akorera amadolari 50

Amafoto: Shema Innocent


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .