Shema Maboko Didier yitabiriye itangazwa ry’amakipe azakina BAL 2020 arimo Patriots BBC

Yanditswe na Eric Tony Ukurikiyimfura
Kuya 16 Gashyantare 2020 saa 10:54
Yasuwe :
0 0

Kuva ku wa Gatanu w’iki cyumweru, Umunyamabanga Uhoraho muri Minisiteri ya Siporo, Shema Maboko Didier, ari kubarizwa i Chicago muri Leta Zunze Ubumwe za Amerika, aho yitabiriye ibikorwa bitandukanye birimo itangazwa ry’amakipe 12 azakina Basketball Africa League (BAL 2020) igiye kuba ku nshuro yayo ya mbere.

Igikorwa cyo gutangaza aya makipe cyahuriranye n’itangizwa ku mugaragaro rya NBA All-Star 2020, ryitabiriwe n’abarimo Perezida wa BAL, Amadou Gallo Fall; Umunyamabanga Mukuru wa FIBA, Andreas Zagklis; Komiseri wa NBA, Adam Silver na Perezida wa FIBA, Hamane Niang.

Hari kandi Umuyobozi wa FIBA Africa akaba n’Umuyobozi w’Inama y’Ubutegetsi ya BAL, Anibal Manave; Umuyobozi w’Ibikorwa bya FIBA Afrique, Alphonse Bilé n’abandi batandukanye.

Amadou Gallo Fall yavuze ko “ari igihe cy’amateka kuba bahaye ikaze amakipe 12 azakina bwa mbere umwaka w’imikino wa BAL. Mu guhagararira ibihugu byayo, azagaragaza iri rushanwa nk’umusaruro mwiza ku rwego rw’Isi mu gushimisha abafana bo mu myaka itandukanye ubwo rizaba ritangira tariki ya 13 Werurwe.”

Amakipe yabaye aya mbere mu bihugu bitandatu Angola, Misiri, Maroc, Nigeria, Sénégal na Tunisia, azakina umwaka w’imikino wa BAL 2020 nubwo atabanje guca mu majonjora abiri yabaye mu mwaka ushize.

Andi makipe atandatu asigaye ni ayabonye itike binyuze mu majonjora, akaba ava mu bihugu bya: Madagascar, Algérie, Cameroun, Mali, Mozambique n’u Rwanda.

Muri uyu muhango herekanywe uko imyenda amakipe azambara muri iri rushanwa izaba imeze, aho atandatu azambikwa na Nike, andi asigaye yambare Jordan.

Umwaka usanzwe w’imikino wa BAL 2020, uzabera i Cairo mu Misiri, Dakar (Sénégal), Lagos (Nigeria), Luanda (Angola), Monastir (Tunisia) na Salé (Maroc) mu gihe Umujyi wa Kigali (Rwanda) uzakira imikino ya Playoffs n’iya nyuma isoza irushanwa muri Gicurasi 2020.

Amakipe 12 azakina iri rushanwa azagabanywa mu duce tubiri, agace kamwe gakinire mu mijyi itatu. Buri kipe izakina imikino itanu mu mwaka usanzwe w’imikino, ihure na buri kipe biri kumwe mu gace kamwe.

Amakipe ane ya mbere muri buri gace ni yo azabona itike yo gukina imikino ya Playoffs izabera i Kigali mu Rwanda.

Amakipe azakina BAL 2020 ni: GSP (Algérie), Petro Atlético de Luanda (Angola), FAP (Cameroun), Zamalek (Misiri), GNBC (Madagascar), AS Police (Mali), AS Salé (Maroc), Ferràvio Maputo (Mozambique), Rivers Hoopers BBC (Nigeria), Patriots BBC (Rwanda), AS Douanes (Sénégal) na US Monastir (Tunisie).

Umunyamabanga uhoraho muri Minisiteri ya Siporo, Shema Maboko Didier, asuhuzanya na Perezida wa BAL, Amadou Gallo Fall, imbere y'ikirango kigaragaza ko Patriots BBC yo mu Rwanda iri mu makipe azakina BAL 2020
Abayobozi batandukanye bitabiriye iki gikorwa cyabereye i Chicago muri Amerika
Hari amakipe atandatu azambikwa na Nike
Amwe mu makipe azambikwa na Jordan
Abayobozi bitabiriye itangazwa ry'amakipe azakina BAL 2020, bafashe mu ntoki imyenda azajya yambara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza