Shampiyona ya NBA yahagaritswe kubera Coronavirus

Yanditswe na Eric Tony Ukurikiyimfura
Kuya 12 Werurwe 2020 saa 09:25
Yasuwe :
0 0

Ubuyobozi bwa Shampiyona ya Basketball muri Amerika, NBA, bwafashe icyemezo cyo guhagarika imikino yose nyuma y’uko hagaragajwe ko umwe mu bakinnyi ba Utah Jazz, Rudy Gobert, yanduye Coronavirus.

NBA yari mu nzira zo gufata uwanzuro w’uko imikino yajya ibera mu muhezo mu rwego rwo kwirinda ikwirakwizwa ry’iki cyorezo.

Itangazo yashyize hanze mu rukerera rwo kuri uyu wa Kane, rivuga ko imikino yose yabaye ihagaritswe kugeza igihe kizatangazwa nyuma yo gufata ingambwa zihagije zo kurwanya iki cyorezo.

Ibi byaje bikurikira ko hari umukinnyi wa Utah Jazz, Rudy Gobert, wagaragayeho Coronavirus, aho byatangajwe mbere gato y’uko haba umukino wari guhuza Jazz na Oklahoma City Thunder muri Chesapeake Energy Arena mu rukerera rwo kuri uyu wa Kane.

Rudy Gobert ntabwo yari muri iyi Arena, ariko hari amashusho yagaragajwe ko yafashe kuri micro z’abanyamakuru ubwo yatangaga ikiganiro nyuma y’umukino uheruka.

Utah Jazz yatangaje ko abaganga bayo mu gitondo bari basanze uyu mukinnyi nta Coronavirus afite, ariko ku bufatanye bw’abaganga ba NBA n’aba Oklahoma, bakaba bo basanze yaranduye Coronavirus.

Iyi kipe yatangaje ko kandi Gobert ari muri Oklahoma, aho ari kwitabwaho n’abaganga.

Tim Reynolds ukorera Associated Press yatangaje ko imikino yabaye ihagaritswe mu gihe cy’ibyumweru bibiri.

Nyiri Dallas Mavericks, Marc Cuban, yavuze ko amakipe yemerewe gukomeza gukora imyitozo ariko akaba abujijwe kuva mu Mujyi umwe ajya mu wundi.

Umunyamakuru wa ESPN, Adrian Wojnarowski, we yavuze ko amakipe yose yakinnye na Utah Jazz mu minsi 10 ishize, yasabwe gushyira abakinnyi bayo mu kato, ayo akaba ari Cleveland Cavaliers, New York Knicks, Boston Celtics, Detroit Pistons, Toronto Raptors na Oklahoma City Thunder.

Kugeza ubu muri Amerika habarurwa abarwaye Coronavirus 1284, aho 37 ari bo bamaze guhitanwa n’iki cyorezo.

Shampiyona ya NBA yabaye ihagaritswe kubera Coronavirus
Rudy Gobert bivugwa ko ari we mukinnyi wa Utah Jazz wanduye Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .