00:00:00 IGIHE NETWORK KN KINYARWANDA EN ENGLISH FR FRANCAIS

Rwabuze gica hagati ya Patriots BBC na REG BBC; hategerejwe umukino wa Gatanu

Yanditswe na Byiringiro Osée Elvis
Kuya 15 September 2022 saa 10:55
Yasuwe :

Patriots yatsinze REG BBC amanota 78-65 mu mukino wa kane wa kamparamaka wabaye kuri uyu wa Gatatu tariki 14 Nzeri 2022, amakipe yombi anganya intsinzi ebyiri.

Ni umukino watangiranye imbaraga nyinshi kuri Patriots yatangiye neza itsinda n’amanota menshi. Agace ka mbere karangiye Patriots itsinze REG BBC amanota 14-11.

Mu gace ka kabiri n’ubundi Patriots yakomereje aho yasoreje aka mbere, ari nako abasore bayo nka Gasana Kenneth wigaragaje cyane muri iyi mikino ya kamparamaka, yatsindaga amanota menshi.

Kaje kurangira Patriots igatsinze ku kinyuranyo cy’amanota 20 kuko amakipe yombi yagiye kuruhuka Patriots itsinze REG BBC amanota 41-21.

REG yavuye mu karuhuko ikarishye ku buryo mu minota itatu ya mbere y’agace ka gatatu, yatsinze amanota icyenda Patriots itaratsinda na rimwe, Patriots ihita isaba akanya ko kwitekerezaho (Time out).

REG yakomeje kugerageza kugabanya ikinyuranyo ariko Patriots wabonaga ifite ingufu bikomeye iyibera ibamba, agace ka gatatu karangira REG ikuyemo amanota arindwi gusa kuko Patriots nako yagatsinze kakarangira amanota ari 56-43.

Agace ka kane REG yagarutse iri hejuru nk’uko yari imaze iminsi ibikora, Nshobozwabyosenumukiza atsinda amanota menshi mu minota itatu ku buryo ikinyuranyo cyari amanota ane gusa.

Patriots yahise yikubita agashyi irongera isubira hejuru ya REG BBC umukino urangira Patriots iwutsinze ku kinyuranyo cy’amanota 13, ifite 78 kuri 65 ya REG BBC.

Gutsindwa uyu mukino kwa Patriots kwatumye amakipe yombi anganya intsinzi ebyiri kuri ibyeri, byabaye ngombwa ko hazitabazwa umukino wa gatanu wo kumenya uzegukana igikombe cya shampiyona.

Umukino wa gatanu, uteganyijwe ku Cyumweru tariki 18 Nzeri 2022 Saa Moya muri BK Arena.

Uyu mukino wabanjirijwe n’undi wa Kane wa nyuma mu bakobwa, warangiye APR BBC inaniwe kwigaranzura REG BBC ngo bategereze umukino wa gatanu.

REG Women BBC yatwaye igikombe cya shampiyona itsinze APR imikino itatu kuri umwe, nyuma yo kuyitsinda amanota 63-54.

REG Women BBC yatwaye igikombe cya shampiyona na sheki ya Miliyoni 10 Frw. APR BBC yabaye iya kabiri yahawe miliyoni eshanu z’amanyarwanda.

Muganza Nyota Mireille wa REG ni we wabaye umukinnyi witwaye neza.

Abafana ba REG bari baserutse biteguye gutwara igikombe Patriots ibabera ibamba
Axel Mpoyo yatsinze amanota menshi muri uyu mukino
Cleveland Thomas ntiyigaragaje nk'uko byagenze mu mikino iheruka
Gasana ni umwe mu bakinnyi ngenderwaho muri Patriots
Crawford na Wamukota batera imbaraga bagenzi babo bari mu kibuga
Ni umukino uhuruza imbaga
Ntore Habimana ni umwe mu bakinnyi bari bazonze REG
Wari umukino urimo uguhangana gukomeye ku mpande zombi
APR BBC yabaye iya kabiri mu bagore, yegukanye miliyoni eshanu
Minisitiri Mimosa Munyangaju ashyikiriza Muganza Nyota Mireille igihembo cy'umukinnyi mwiza
REB y'abagore yegukanye igikombe cya Shampiyona ihabwa miliyoni 10 Frw

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .