Iki kibuga cyubatswe ni icya 31 mu bibuga 100 bigomba kubakwa na Giants of Africa mu bihugu bitandukanye muri Afurika, kikaba icya karindwi mu Rwanda.

Perezida wa FERWABA, Mugwiza Désiré yashimiye Umuryango Giants of Africa ku ruhare wagize ngo iki kibuga cyubakwe, asaba Abanya-Rubavu kuzakibyaza umusaruro.

Ati “Ibi birenze kuba ikibuga gusa kuko Basketball ntabwo ari umukino gusa ahubwo ifasha urubyiruko kugira inzozi zagutse bityo bakazavamo ibihangange.

Yakomeje agira ati “Ndasaba Akarere ka Rubavu gufasha urubyiruko gukina no kwerekana impano zabo ndetse turifuza ko kagira ikipe ya Basketball.”

Umuyobozi Ushinzwe Iterambere muri Minisiteri ya Siporo, Rwego Ngarambe yatangaje iki kibuga kizaha amahirwe abakiri bato.

Ati “Iki kibuga kizafasha abana kubona aho bazamurira impano zabo bityo ababifuza bazabone aho babasanga byoroshye. Twavuganye n’akarere ko kagiye gushyiramo imbaraga uyu mukino ukongera kuzamura urwego.”

Sarah Chan uri mu batoza ba Giants of Africa akaba n’ushinzwe gushaka abakinnyi muri Toronto Raptors muri Afurika yasabye ko impano z’i Rubavu zakongera gushyirwamo imbaraga.

Ati “I Rubavu hari impano nyinshi za Basketball hanavuye abandi bakomeye nka Kazingufu Ally ari na yo mpamvu twifuje kuhegera. Twifuza ko iki kibuga cyazafasha urubyiruko kugera ku nzozi zabo mu kibuga ndetse no hanze yacyo.”

Abana 50 bitabiriye itahwa ry’iki kibuga basanzwe bakina Basketball muri aka karere, bahawe imiguru ibiri y’inkweto n’imyambaro yo kubafasha mu mikinire yabo.

Masai Ujiri w’imyaka 53 uvuka muri Nigeria, abinyujije mu mushinga we Giants of Africa (GOA), afasha abana bakiri bato bo muri Afurika gukura bakunda umukino wa Basketball.

Uyu mushinga wa GOA watangiye mu 2003 ukorera muri Nigeria gusa kugera mu 2014 ubwo Masai yafunguraga imipaka atangira kubikora no mu bindi bihugu bitandukanye bya Afurika birimo n’u Rwanda.

I Rubavu hatashywe ikibuga gishya cya Basketball cyubatswe na Giants of Africa

Perezida wa FERWABA, Mugwiza Désiré yashimiye Umuryango Giants of Africa ukomeje kubafasha kubona ibibuga

Umuyobozi Ushinzwe Iterambere muri Minisiteri ya Siporo, Rwego Ngarambe yatangaje iki kibuga kizaha amahirwe abakiri bato

Sarah Chan uri mu batoza ba Giants of Africa yasabye ko i Rubavu bongera kwita ku mpano za Basketball

Umuyobozi w'akarere ka Rubavu, Mulindwa Prosper yizeje ikipe nshya ya Basketball yo muri aka karere

Abana berekanye ubuhanga bafite mu gukina Basketball

Iki kibuga cyitezweho gufasha impano nyinshi kuzamura urwego

Iki kibuga cyabaye icya karindwi Giants of Africa yubatse mu Rwanda