REG BBC yihanije mukeba Patriots BBC, yisubiza Igikombe cy’Intwari (Amafoto)

Yanditswe na Ngabo Roben
Kuya 2 Gashyantare 2019 saa 11:14
Yasuwe :
0 0

Mu mukino utari unogeye ijisho nubwo wari witabiriwe na benshi, REG BBC yatsinze itababariye Patriots BBC amanota 95 kuri 72, yegukana igikombe cy’Intwari ku nshuro ya kabiri yikurikiranya.

Mu ijoro ryo kuri uyu wa Gatanu tariki 1 Gashyantare 2019, abakunzi b’imikino benshi bari bateraniye mu gace ka Remera mu Mujyi wa Kigali, ahasorezwaga igikombe cy’Intwari mu mikino itandukanye.

Umukino w’umupira w’amaguru APR FC yatsinzemo Rayon Sports 1-0 kuri stade Amahoro urangiye, abenshi mu bawukurikiranye bahise bajya muri Petit Stade Amahoro kwihera ijisho umukino wahuje amakipe akomeye kurusha andi muri Basketball y’u Rwanda, REG BBC na Patriots BBC.

Benshi bari biteze umukino urimo ihangana rikomeye ariko siko byagenze kuko ikipe imwe yagaragaje urwego rwo hejuru isiga indi cyane mu manota, bituma aho igikombe cyerekeza hagaragara hakiri kare.

Bitandukanye no muri shampiyona aho umubare w’abanyamahanga wemewe ari babiri gusa mu mukino, mu gusoza irushanwa ry’Intwari ikipe ya REG BBC yakinishije abanyamahanga bayo bose; Mukengerwa Benjamin, Ngandu Mbanze Bienvenu bakomoka muri RDC na Beleck Bell Engelbert ukomoka muri Cameroun.

Ibi byagoye cyane Patriots BBC bituma itsindwa amanota 21 kuri 15 mu gace ka mbere inatsindwa 26 kuri 13 mu gace ka kabiri byatumye bajya kuruhuka REG BBC iyirusha amanota 20 yose.

Mu duce tubiri twa nyuma ntabwo byahindutse, umukino wa REG BBC uyoborwa na Nshobozwabyosenumukiza Jean Jacques Wilson yakomeje kuyobora kuko agace ka gatatu yinjijemo amanota 25 kuri 18 ya Patriots BBC yari iyobowe na Mugabe Aristide utari mu bihe byiza na Sagamba Sedar wakinnye arwaye urutugu.

Mu gace ka nyuma Patriots BBC yihagazeho yinjiza amanota 26 kuri 23 ya REG BBC ariko ntibyagira icyo bihindura umukino urangira ari amanota 95 kuri 72.

Muri uyu mukino abakinnyi b’abanyamahanga nibo bahetse amakipe yabo kuko Beleck Bell Engelbert yatsinze amanota menshi, 18 ku ruhande rwa REG BBC, naho umunya-Kenya Michael Makiadi Ongea wa Patriots BBC aba uwa mbere winjije amanota menshi mu mukino muri rusange, aho yatsinze amanota 21.

Aba ni nabo babaye aba mbere mu gukora ‘rebounds’ nyinshi, 16 za Makiadi n’umunani za Beleck Bell Engelbert.

Nyuma y’uyu mukino witabiriwe n’abanyacyubahiro batandukanye barimo Perezida wa Sena, Bernard Makuza, Minisitiri wa Siporo n’Umuco, Espérance Nyirasafari na Pierre Damien Habumuremyi uyobora CHENO, ikipe ya REG BBC yashyikirijwe igikombe cy’Intwari ku nshuro ya kabiri yikurikiranye kuko ari nayo yagitwaye mu 2018.

REG BBC yatangiranye imbaraga nyinshi
Uyu mukino wari witezweho ihangana ariko REG BBC itsinda Patriots inayirusha
Ellie Kaje wa REG BBC ntabwo ari mu batsinze amanota menshi ariko yagoye cyane Patriots BBC
Hagumintwari na bagenzi be bagerageje mu gace ka nyuma ariko ikinyuranyo cy'amanota batsinzwe mbere ntibakimaramo
Hagumintwari Steven yatsinze amanota 21 yose ariko ntibyahesha ikipe ye intsinzi
Imbaraga zari zose muri uyu mukino
Imikino yateguwe n'Urwego rw'Igihugu rushinzwe Intwari z'Igihugu, Imidari n'Impeta by'Ishimwe. CHENO
Kuba Sagamba yakinnye arwaye urutugu byatumaga adahangana uko bisanzwe
Habaye ukwitanga gukomeye ku mpande zombi
Mukengerwa Benjamin yagiye akora amacenga anogeye ijisho
Minisitiri Nyirasafari na DR Habumuremyi bareba ihangana rya REG BBCna Patriots BBC
Petit Stade yari yakubise yuzuye
Inshuro nyinshi REG yagiye iba iya mbere ku mupira
Sagamba Sedar usanzwe uyobora umukino wa Patriots BBC ntabwo yari mu bihe byiza
Si ugutsinda gusa, Beleck Bell Engelbert no kugarira arabizi
Umukino wabereye muri Petit Stade i Remera
Umurundi Patrick Ngwijuruvugo utoza REG BBC akomeje gukusanya ibikombe
Umuyobozi wa Ferwafa, Brig Gen Sekamana Jean Damascene (hagati) ari mu bavuye kureba APR FC na Rayon Sports bagahitira muri Petit Stade
Ally Kubwimana Kazingufu ashyikirizwa igikombe cy'Intwari
Beleck Bell Engelbert ukomoka muri Cameroun niwe watowe nk'umukinnyi w'irushanwa
Byari ibyishimo kuri iyi kipe y'Ikigo cy'Igihugu Gishinzwe Ingufu
Minisitiri wa Siporo n'Umuco, Nyirasafari Espérance, yitabiriye imikino ya Basketball ku nshuro ya mbere kuva yahabwa izi nshingano
REG BBC yatwaye igikombe na sheki y'ibihumbi 500 Frw

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza