REG BBC yigaranzuriye Patriots BBC muri Kigali Arena, iyitwara irushanwa ry’Agaciro 2019 (Amafoto)

Yanditswe na Eric Tony Ukurikiyimfura
Kuya 30 Ugushyingo 2019 saa 08:51
Yasuwe :
0 0

REG BBC ni yo yegukanye igikombe cy’Irushanwa ry’Agaciro ryakinwe ku nshuro ya mbere muri Basketball, itsinze mukeba wayo, Patriots BBC, amanota 61-50 ku mukino wa nyuma wakiniwe muri Kigali Arena kuri uyu wa Gatanu.

Iyi ntsinzi yabaye ukwibohora no kwigaranzura kw’ikipe ya REG BBC yari itarabona intsinzi n’imwe mu mikino ine yaherukaga guhuriramo na Patriots BBC muri iyi nzu y’imikino yakira abantu ibihumbi 10, ariko kuri uyu mugoroba yarimo abagera nko ku bihumbi 6,500.

Kaje Elie na Shyaka Olivier bayoboye umukino ku ruhande rw’iyi kipe ya sosiyete y’igihugu ishinzwe ingufu ndetse nta wakwirengagiza uruhare rw’abarimo Nshobozwabyosenumukiza Wilson, ku isonga hakaza umutoza Henry Mwinuka wahuraga n’ikipe yavuyemo.

Patriots BBC yatozwaga n’Umunya-Kenya, Odhiambo Carey, yayoboye agace ka mbere ku manota 14-6, ariko kuva icyo gihe umukino wahise uhinduka.

REG BBC yari ihagaze neza mu kugarira no kwambura imipira, yakinishije imbaraga nyinshi, mu gace ka kabiri itsindamo amanota 20 kuri atanu ya Patriots BBC mu gihe n’aka gatatu yabonyemo 24-14, aka nyuma amakipe zombi anganya 17-17.

Umukino warangiye harimo ikinyuranyo cy’amanota 11 (61-50), aho Kaje Elie wa REG BBC na Nijimbere Guibert (Patriots BBC) buri umwe yatsinzemo amanota 17.

Shyaka Olivier wa REG BBC wanatowe nk’umukinnyi w’irushanwa mu bagabo, yatsinzemo amanota 13.

Mu bagore, igikombe cyegukanwe na The Hoops Rwa yatsinze APR WBBC amanota 66-52 ku mukino wa nyuma.

Muri iki cyiciro, Micomyiza Rosine wa The Hoops Rwa, yatowe nk’umukinnyi w’irushanwa.

Mu batarengeje imyaka 17, irushanwa ryegukanwe n’ikipe ya The Hoops yatsinze Elites amanota 104-100. Umukinnyi wabaye uw’irushanwa ni Murenzi Roméo wa The Hoops.

Abakinnyi ba Patriots BBC bitabajwe kuri uyu mukino wa nyuma
Abakinnyi ba REG BBC bakinnye umukino wa nyuma
Mukengerwa Benjamin atwara umupira mu gihe Nijimbere Guibert yashakaga uko awumwambura
REG BBC yaje ibizi ko yatsinzwe imikino ine iheruka guhuriramo na Patriots BBC muri Kigali Arena
Nshobozwabyosenumukiza asimbuka ngo ashyire umupira mu nkangara
Kasongo Junior Aubin yitwaye neza mu gukuramo no gusama imipira ijya mu nkangara
George Wilbert wa Patriots BBC adunda umupira
Kapiteni wa Patriots BBC, Mugabe Aristide ashaka inzira
Sagamba Sedar yitegereza aho ashyira umupira
Sagamba ari mu bakinnyi bitwaye neza ku ruhande rwa Patriots BBC
Pegeus Darrius wa Patriots nyuma yo kugwa hasi
Darrius ahanganiye umupira na Ngandu Bienvenue
Shyaka Olivier wabaye umukinnyi w'irushanwa, atsinda amanota
Nshobozwabyosenumukiza ni we wakinnye iminota myinshi kurusha abandi muri REG BBC
Kaje Elie ashaka uko yashota mu gihe Nijimbere yateze amaboko
Byarangiye uyu mukinnyi wa REG BBC, ahisemo kumucenga, atanga umupira
Darrius, Makiadi na Kaje Elie batanguranwa umupira ku nkangara
REG BBC yegukanye irushanwa ry'Agaciro 2019 itsinze Patriots BBC
The Hoops Rwa yegukanye igikombe mu bagore

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .