REG BBC yatsinze Patriots BBC kuri Saint-Valentin, Tigers itungura Espoir BBC

Yanditswe na Eric Tony Ukurikiyimfura
Kuya 15 Gashyantare 2020 saa 09:06
Yasuwe :
0 0

REG BBC yafashe umwanya wa mbere nyuma yo gutsinda mukeba wayo, Patriots BBC, amanota 77-64 mu mukino w’umunsi wa karindwi wa Shampiyona ya Basketball iterwa inkunga na Banki ya Kigali PLC, wabaye kuri uyu wa Gatanu ku munsi w’abakundana uzwi nka Saint-Valentin muri Petit Stade i Remera.

Patriots BBC yatsinzwe na REG BBC mu mikino yose yahuje amakipe yombi nyuma y’imikino ya Playoffs isoza shampiona y’umwaka ushize w’imikino, ikomeje kugorwa na Shampiyona y’uyu mwaka, aho yatsinzwe umukino wa kabiri nyuma yo gutangira itsindwa na IPRC Kigali.

Ejo hashize, ni yo yabanje kwinjira neza mu mukino, ibifashijwemo n’abarimo Hagumintwari Steve, Kasongo Aubin Junior, Mugabe Aristide, Sagamba Sedari n’umukinnyi mushya Prince Eze Nmandi itsinda agace ka mbere ku manota 23-14 ya REG BBC.

Ikipe y’Ikigo cy’Igihugu gishinzwe Ingufu (REG), itozwa na Henry Mwinuka wari muri Patriots BBC mu myaka itatu ishize, yafashijwe na Kami Kabange, Nshobozwabyosenumukiza na Beleck Bell gukuramo ikinyuranyo cy’amanota yarushwaga, iyicaho (28-27) ubwo Shyaka Olivier yatsindaga amanota abiri habura iminota ine n’amasegonda 27 ngo agace ka kabiri karangire.

Kami Kabange na Kazingufu Ally bagize uruhare mu gukomeza kuyobora umukino kwa REG BBC ndetse agace ka kabiri karangira harimo ikinyuranyo cy’amanota 12 (44-32).

Mu gace ka gatatu, Patriots BBC yagabanyijeho amanota ane mu yo yarushwaga (61-52), ariko umukino urangira harimo ikinyurancyo cy’amanota 13 (77-64).

Kuri uyu mukino, hagaragaye kandi abagabo bashobora kugirwa abatoza ba Patriots BBC yitegura imikino ya Basketabll Africa League (BAL 2020) izatangira mu kwezi gutaha, aho iyi kipe yatwaye Shampiyona iheruka, yari imaze iminsi itozwa na Mukurarinda Jean Claude afatanya na Munyaneza Edouard.

Undi mukino wabaye, wahuje Espoir BBC na Tigers BBC, habaho gutungurana, Tigers yinjiye muri Shampiyona uyu mwaka itsinda umukino n’amanota 102 kuri 97 ya Espoir BBC.

Nshobozwabyosenumukiza wa REG BBC ashaka inzira hagati y'abakinnyi ba Patriots BBC
Shyaka Olivier mu kirere, ashyira umupira mu nkangara
Patriots BBC imaze gutsindwa imikino ibiri muri ine ya Shampiyona y'uyu mwaka mu gie REG BBC yatsinze imikino itatu yakinnye
Umukino wari witabiriwe n'abatari bake muri Petit Stade i Remera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .