REG BBC yasanze Patriots BBC ku mukino wa nyuma w’irushanwa ry’Agaciro

Yanditswe na Eric Tony Ukurikiyimfura
Kuya 24 Ugushyingo 2019 saa 09:50
Yasuwe :
0 0

Ku nshuro ya gatanu, REG BBC izongera guhurira na Patriots BBC muri Kigali Arena ubwo hazaba hakinwa umukino wa nyuma w’Irushanwa ry’Agaciro 2019 uzaba ku wa Gatanu tariki ya 29 Ugushyingo.

Ikipe y’ikigo cy’igihugu gishinzwe amashanyarazi yabigezeho nyuma yo gutsinda APR BBC amanota 71-66 mu mukino wabaye kuri uyu wa Gatandatu.

Iri rushanwa ry’Agaciro muri Basketball ni ku nshuro ya mbere riri kuba, aho ryahuje amakipe ane yaje mu myanya ya mbere muri Shampiyona y’abagabo n’iy’abagore kongeraho andi atandatu y’abakiri bato batarengeje imyaka 17.

REG BBC yatangiye neza muri uyu mukino wabereye muri Petit Stade i Remera, itsindirwa amanota atatu abanza na Kami Kabange ariko Munyaneza Eric yishyurira APR FC BBC atsinda atatu icya rimwe.

Ngandu Bienvenu yongeye gufasha REG BBC kujya imbere ndetse n’abandi barimo Ishimwe Parfait, Nshobozwabyosenumukiza na Kaje Elie batuma iyi kipe itsinda agace ka mbere ku manota 17-11.

Mu gace ka kabiri, amakipe yombi yagaragaje guhangana gukomeye ndetse buri kipe itsindamo amanota 15, bituma ajya kuruhuka hakirimo ikinyuranyo cy’amanota atandatu.

APR BBC yakomeje kugaragaza imbaraga nyinshi muri uyu mukino n’ubundi amakipe yombi atsinda amanota 16 mu gace ka gatatu mu gihe iyi kipe y’ingabo yatsinze agace ka nyuma ku manota 24-23, ariko birangira itakaje umukino kuko itakuyemo ikinyuranyo cy’amanota yose yatsinzwe mu gace ka mbere, umukino urangira ari 71-66.

Nshobozwabyosenumukiza Jean Wilson wa REG BBC ni we watsinze amanota menshi muri uyu mukino (20) mu gihe Sangwe Armel wakinaga umukino wa mbere muri APR BBC, yatsinzemo amanota 16.

Gutsinda uyu mukino byatumye REG BBC isanga Patriots BBC ku mukino wa nyuma uzaba ku wa Gatanu tariki ya 29 Ugushyingo muri Kigali Arena. Patriots BBC yo yabigezeho ku wa Gatanu itsinze Espoir BBC.

Mu bagore, The Hoops yasanze APR WBBC ku mukino wa nyuma, itsinze RP-IPRC Huye WBBC amanota 73-67.

Micomyiza Rosine wa The Hoops yatsinzemo amanota 26 mu gihe Urwibutso Nicole yatsindiye IPRC Huye amanota 24.

Mu cyiciro cy’ingimbi, The Hoops yatsinze Gikondo Boys amanota 84-58.

REG BBC zizahurira ku mukino wa nyuma w'irushanwa ry'Agaciro 2019 uzaba ku wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .