REG BBC na IPRC Huye zegukanye ibikombe by’Intwari 2020 muri Basketball

Yanditswe na Eric Tony Ukurikiyimfura
Kuya 3 Gashyantare 2020 saa 07:50
Yasuwe :
0 0

REG BBC ni yo yegukanye Igikombe cy’Intwari 2020 nyuma yo gutsinda APR BBC amanota 71-62 ku mukino wa nyuma w’iri rushanwa ryasojwe kuri iki Cyumweru kuri Petit Stade i Remera, mu gihe mu bagore ryegukanywe na IPRC Huye itsinze The Hoops.

Iri rushanwa rikinwa mu rwego rwo kwizihiza umunsi w’Intwari uba tariki ya 1 Gashyantare, ryateguwe na FERWABA ku bufatanye n’Urwego rushinzwe Intwari z’Igihugu, Imidali n’Impeta by’ishimwe (CHENO).

Mu bagabo, umukino wa nyuma wahuje REG BBC yari iwugezeho ku nshuro ya gatatu yikurikiranya ndetse na APR BBC yawukinaga bwa mbere mu myaka itanu iheruka.

REG BBC yinjiye neza mu mukino, itsinda agace ka mbere ku manota 21-15 ndetse na 25-17 mu gace ka kabiri, amakipe yombi ajya kuruhuka harimo ikinyuranyo cy’amanota 14 (46-32).

Nubwo APR BBC yatsinze amanota menshi mu gace ka gatatu ndetse ikagabanya ikinyuranyo kigasigara ari amanota icyenda gusa (57-48), REG BBC yihagazeho mu gace ka mbere isoza umukino iri imbere n’amanota 71-62.

Ni ku nshuro ya gatatu yikurikiranya REG BBC yegukanye iri rushanwa, nyuma y’uko yaritwaye mu 2018 imaze gutsinda Patriots BBC amanota 54-51 mu gihe mu mwaka ushize yayitsinze amanota 92-72.

Mu cyiciro cy’abagore, RP-IPRC Huye WBBC yaherukaga kwegukana iri rushanwa mu 2018,yongeye kuritwara ubwo yatsindaga The Hoops Rwanda amanota 70-47.

Agace ka mbere ku mukino karangiye IPRC Huye iyoboye n’amanota 18-9, ariko The Hoops iza kuyigaranzura, iyitsinda amanota 18-13 mu gace ka kabiri (31-27).

Iyi kipe y’ishuri ryo mu Majyepfo yongeye kuzamura amanota mu gace ka gatatu karangiye ari 23-12 (54-39) ndetse yongeramo andi manota atandatu y’ikinyuranyo mu gace ka nyuma, umukino urangira ari 70-47.

REG BBC na IPRC Huye WBBC, zombi zahawe ibikombe na sheki y’ibihumbi 500 Frw mu gihe APR BBC na The Hoops Rwa zabaye iza kabiri mu bagabo n’abagore, zahawe ibihumbi 300 Frw.

Nshobozwabyosenumukiza wa REG BBC adunda umupira muri uyu mukino wa nyuma wakinwe kuri iki Cyumweru
APR yakinaga umukino wa nyuma ku nshuro ya mbere mu myaka itanu iheruka mu gihe REG BBC yawukinaga ku nshuro ya gatatu
Beleck Bell wa REG BBC asatira ahari inkangara nyuma yo gusiga abakinnyi ba APR BBC
Sangwe Armel wa APR ashaka inzira
The Hoops Rwa yabaye iya kabiri mu bagore, yahawe ibihumbi 300 Frw
IPRC Huye WBBC yegukanye iri rushanwa mu bagore, yahawe igikombe n'ibihumbi 500 Frw
APR BBC yabaye iya kabiri mu bagabo ishyikirizwa sheki y'ibihumbi 300 Frw
REG BBC yegukanye irushanwa ry'Intwari ku nshuro ya gatatu yikurikiranya

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .