Perezida Kagame na Masai Ujiri bamuritse iserukiramuco rya Giants of Africa rizahuza ibihugu 11 (Amafoto)

Yanditswe na Eric Tony Ukurikiyimfura
Kuya 20 Gashyantare 2020 saa 05:54
Yasuwe :
0 0

Perezida wa Repubulika Paul Kagame ari kumwe na Perezida w’Ikipe ya Toronto Raptors ikina muri Shampiyona ya Basketball ya Amerika (NBA), Masai Ujiri, bamuritse iserukiramuco rya Giants of Africa rizabera i Kigali muri Kanama uyu mwaka rigahuza ibihugu 11.

Giants of Africa (GOA) ni gahunda yatangijwe na Masai Ujiri uvuka muri Nigeria, aho afasha abakiri bato bo ku Mugabane wa Afurika gukura bakunda umukino wa Basketball.

Iri serukiramuco rizahuza abahungu n’abakobwa 200 bo mu bihugu 11 bya Afurika, guhera tariki ya 16 kugeza ku wa 22 Kanama 2020.

Mu kumurika ibikorwa by’iri serukiramuco, Perezida Kagame yashimiye Masai Ujiri wazanye Umushinga Giants of Africa, avuga ko iri huriro ari ingenzi ku buryo ryabyazwa umusaruro mu kuzamura abana ba Afurika.

Ati “Ndashaka guha ikaze buri wese kandi muzabona ko kugeza muri Kanama iki gihugu ari igihugu gitanga ikaze. Ni igihugu giharanira ishema kandi kikanabikorera Afurika.”

“Tugomba kwiyitaho ubwacu, tugakora ibikenewe gukorwa by’umwihariko tukabyaza umusaruro amahirwe dufite nk’iri huriro rizahuza abana bato ba Afurika ari nabo benshi ku mugabane wacu. Twizeye ko tuzabibyaza umusaruro nk’uko Masai yabivuze kare, Abanyafurika turatsinda muri gahunda zose twikoreye. Tujye imbere rero.”

Masai Ujiri na we yashimiye Perezida Kagame ku ruhare agaragaza mu iterambere rya Afurika, avuga uburyo ari umugabo ushyira mu bikorwa ibyo yiyemeje byose nko kuba yaramubwiye ko agiye kubaka Kigali Arena none ubu akaba ari yo yabereyemo iki gikorwa.

Ati “Ndashimira kandi Perezida Kagame ku ruhare rwe rushimishije cyane no kuba yaremereye ko iri huriro ryabera hano. Afurika igomba gutsinda kuko turi abatsinzi.”

Myrah Naomi Nantume umwe mu banyuze muri gahunda ya Giants of Africa, yavuze uburyo ifasha abana mu kububakira ubuzima atari mu mukino wa Basketball gusa, ahubwo muri siporo zitandukanye no mu buzima bwa buri munsi, asaba abantu bose kubyaza umusaruro amahirwe babonye.

Umushinga wa GOA wa Masai Ujiri, watangiye mu 2003 ukorera muri Nigeria gusa kugera mu 2014 ubwo uyu mugabo yafunguraga imipaka atangira kubikora no mu bindi bihugu bitandukanye bya Afurika birimo n’u Rwanda.

Kimwe mu bikorwa byashibutse muri uyu mushinga ni isanwa ry’ikibuga cy’umukino w’intoki wa Basketball cyo kuri Club Rafiki i Nyamirambo. Cyatashywe na Perezida Paul Kagame na Masai Ujiri ku wa 8 Kanama 2017.

Gusana iki kibuga ni isezerano ryatanzwe mu 2015 ubwo abatangije Giants of Africa bazaga mu Rwanda, bakagira umwanya wo kujya guhura n’abana bakinira Basketball kuri Club Rafiki. Hari kandi n’ingando z’abana zikorwa kuva mu 2015.

Ibihugu 11 bizitabira ihuriro rizabera i Kigali ni Sénégal, Mali, Nigeria, Cameroun, Repubulika Iharanira Demokarasi ya Congo, Sudani y’Epfo, Uganda, Rwanda, Tanzania, Kenya na Somalia.

Meya w'Umujyi wa Kigali, Pudence Rubingisa ni umwe mu bayobozi bitabiriye iki gikorwa cyo gutangiza iserukiramuco rya Giants of Africa
Iki gikorwa cyabereye muri Kigali Arena cyitabiriwe n'abayobozi batandukanye
Perezida Kagame na Masai Ujiri watangije umushinga wa Giants of Africa, ubwo bageraga muri Kigali Arena
Masai Ujiri, Perezida Kagame na Minisitiri wa Siporo, Munyangaju Aurore Mimosa bagera muri Kigali Arena
Perezida Kagame asuhuza abitabiriye imurikwa ry'iri serukiramuco muri Kigali Arena
Masai Ujiri, Perezida Kagame na Minisitiri wa Siporo, Munyangaju Aurore Mimosa bagana mu myanya bari bateguriwe
Perezida Kagame, Minisitiri Munyangaju n'abandi bayobozi batandukanye bareba amashusho magufi agaragaza umushinga wa Giants of Africa watangijwe na Masai Ujiri
Masai Ujiri (ubanza ibumoso) yashimiye Perezida Kagame wemeye ko iri serukiramuco ribera mu Rwanda
Abana basanzwe bakinira ikipe z'igihugu z'u Rwanda mu batarengeje imyaka 17 ni bo bazanye amabendera y'ibihugu bizitabira iri serukiramuco
Ibihugu 11 birimo u Rwanda ni byo bizahurira i Kigali muri Kanama uyu mwaka
Umubyinnyi Sherrie Silver wari uyoboye abasusurutsa abashyitsi, yerekana abagiye kubyina
Amabendera y'ibihugu 11 bizitabira iserukiramuco rya Giants of Africa rizabera i Kigali
Abashyitsi bitabiriye iki gikorwa basusurukijwe mu mbyino zitandukanye zigezweho
Bamwe mu bana banyuze muri uyu mushinga wa Giants of Africa kuri ubu bakinira ikipe z'u Rwanda mu batarengeje imyaka 17 bari bitabiriye iki gikorwa
Abayobozi batandukanye bitabiriye iki gikorwa bareba amashusho agaragaza intego ya Giants of Africa
Isha Sesay (ubanza ibumoso) umunyamakuru akaba n’umwanditsi ukomeye muri Amerika, ari kumwe na Clare Akamanzi uyobora Ikigo cy'Igihugu cy'Iterambere, RDB
Perezida Kagame n'abandi bayobozi bashimira Isha Sesay wari uyoboye gahunda muri iki gikorwa
Masai Ujiri watangije umushinga wa Giants of Africa avuga ko ugamije kuzamura ubuzima bw'abana bo muri Afurika
Masai Ujiri ufite inkomoko muri Nigeria, yashimiye Perezida Kagame wemeye ko kwakirira iri serukiramuco mu Rwanda
Myrah Naomi Namtume wigeze kwitabira Giants of Africa, yavuze ko uretse gukina, ifasha umuntu gutekereza ibindi ashobora gukora
Uhereye ibumoso ni: Naomi Nantume; Mugwiza Désiré uyobora FERWABA; Umunyamabanga wa Leta muri Minisiteri y'Urubyiruko n'Umuco, Bamporiki Edouard; Minisitiri w'Ibikorwaremezo, Amb. Claver Gatete n'Umunyamabanga wa Leta muri Minisiteri y'Ububanyi n'Amahanga, Amb. Nduhungirehe; Ambasaderi w’u Rwanda muri Leta Zunze Ubumwe za Amerika, Mathilde Mukantabana na Minisitiri w'Ikoranabuhanga na Inovasiyo mu bayobozi bitabiriye iki gikorwa
Isha Sesay agaruka ku mushinga wa Giants of Africa n'icyo umariye abana batandukanye kuri uyu mugabane
Perezida Kagame yatangije iserukiramuco rya Giants of Africa rizaba muri Kanama
Kagame yashimiye kandi Masai Ujiri watangije umushinga wa Giants of Africa
Perezida Kagame yavuze ko iri serukiramuco rizagenda neza buri wese nabigiramo uruhare
Isha Sesay aganira na Perezida Kagame, Masai Ujiri na Naomi Nantume kuri gahunda za Giants of Africa n'akamaro kayo

Amafoto: Niyonzima Moise

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .