Patriots yasubiriye REG BBC bongera guhurira muri Kigali Arena, APR WBBC yegukana Shampiyona (Amafoto)

Yanditswe na Eric Tony Ukurikiyimfura
Kuya 21 Nzeri 2019 saa 06:21
Yasuwe :
0 0

Ku nshuro ya kabiri, Patriots BBC yongeye kubuza REG BBC kwegukana igikombe cya Shampiyona ya Basketball, iyitsinda amanota 78-60 mu mukino wa 6 wabaye kuri uyu wa Gatanu muri Kigali Arena yarimo abafana batari bake.

REG BBC yakinnye iyi mikino ibiri iheruka ibura intsinzi imwe kugira ngo yegukane iyi Shampiyona iterwa inkunga na Banki ya Kigali PLC.

Imbere y’abafana batari bake bari baje kureba uyu mukino muri Kigali Arena ifite ubushobozi bwo kwakira abantu ibihumbi 10 bicaye neza, Patriots BBC yongeye kubabaza REG BBC nk’uko yabikoze mu mukino wa 5 wabaye mu cyumweru gishize.

Patriots yari ibizi ko gutakaza uyu mukino bingana no gutakaza igikombe, yawutangiye iri hejuru ndetse ibifashijwemo na Sagamba Sedar na Ndizeye Dieudonné watsinze amanota atatu, itsinda atanu REG BBC itarakoramo.

Inota rya mbere rya REG BBC muri uyu mukino, ryatsinzwe na Ngandu Mbanze Bienvenu hashize iminota ibiri. Nshobozwabyosenumukiza yatsinze amanota yazamuye ikipe ye muri aka gace ka mbere, ariko Mugabe Aristide na Ndizeye, bafasha Patriots kukayobora n’amanota 16-10.

Sagamba Sedar, Hagumintwari Steven na Makiadi Ongea Michael batumye Patriots ishyiramo ikinyuranyo cy’amanota 13 mu minota ine ya nyuma y’agace ka kabiri, Beleck Bell, Ikishatse Hervé na Kaje Elie bagerageza kuyagabanya, hasigaramo icyenda (38-29).

Habura iminota itandatu n’amasegonda 36 ngo agace ka gatatu karangire, Sagamba Sedar yatsinze amanota atatu yatumye hajyamo ikinyuranyo cya 15 (48-33) ariko abarimo Shyaka Olivier na Nshobozwabyosenumukiza bafasha REG kongera kuyagabanya, karangira ari 55-43.

Iminota itatu ibanza mu gace ka nyuma, yahiriye REG BBC yatsinze amanota arindwi arimo ane ya Nshobozwabyosenumukiza Jean Jacques Wilson n’andi atatu ya Beleck Bell, hasigaramo arindwi (57-50).

REG BBC yatakaje imipira cyane mu minota itatu ya nyuma, ikinyuranyo cyari amanota 10 kigera kuri 18 ubwo iminota yose y’umukino yarangiraga ari 78-60.

Gutsinda uyu mukino kwa Patriots BBC byatumye amakipe yombi anganya imikino 3-3, bityo hakaba hitabazwa umukino wa kamarampaka (wa 7) ukinwa kuri uyu wa Gatandatu saa 19:00 muri Kigali Arena.

Hagumintwari Steven wa Patriots BBC yatsinze amanota 17 muri uyu mukino mu gihe Beleck Bell wa REG BBC, yatsinzemo amanota 13.

Mu bagore, APR WBBC yegukanye igikombe cya Shampiyona nyuma yo gutsinda The Hoops amanota 62-54 mu mukino wa 6, maze igira intsinzi 4-2.

Kantore Sandra wa APR WBBC yatsinzemo amanota 22 mu gihe Mwizerwa Faustine wa The Hoops na Uwizeye Assouma wa APR, bombi batsinzemo amanota 17 kuri buri umwe.

Benshi bari bitabiriye uyu mukino wari ufite kinini uvuze ku makipe yombi
Rayon Sports ishobora gushinga ikipe ya Basketball mu minsi iri imbere
Patriots BBC yari ibizi ko nitsindwa uyu mukino ihita itakaza igikombe
Shema Maboko Didier (hagati), Gaga Didier na Muhirwa Carlos ni bo bayoboye uyu mukino
REG BBC yaburaga intsinzi imwe ngo itware igikombe bitagombereye gukina umukino wa nyuma wa Playoffs
Kigali Arena yakira abantu ibihumbi 10 yari hafi kuzura abafana
Beleck Bell agenda adunda umupira, yiga uburyo atambuka kuri Sagamba Sedar wa Patriots BBC
Umunya-Cameroun Beleck Bell hagati y'abakinnyi ba Patriots, agerageza gutsinda amanota
Abakozi ba Banki ya Kigali PLC itera inkunga iyi Shampiyona baba babukereye
Kubwimana Kazingufu Ally wa REG BBC acenga Mugabe Aristide
Ndizeye Dieudonné ashaka aho anyuza umupira hagati ya Shyaka Olivier na Nshobozwabyosenumukiza
Patriots BBC yari ifite abafana benshi, ntiyoroheye REG BBC muri uyu mukino wa 6
Igor Kovacevic utoza REG BBC, yageze aho abura uko yahindura umukino

Amafoto y’umukino wa The Hoops na APR WBBC

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza