Patriots BBC yatsinze umukino wa mbere muri Shampiyona, Espoir BBC yihanangiriza Shoot For The Stars (Amafoto)

Yanditswe na Eric Tony Ukurikiyimfura
Kuya 8 Gashyantare 2020 saa 08:52
Yasuwe :
0 0

Patriots BBC ifite igikombe cya Shampiyona ya Basketball iheruka, yatsinze APR BBC amanota 64-57 mu mukino wabaye kuri uyu wa Gatanu, ibona intsinzi ya mbere mu mikino ibiri imaze gukinwa.

Intangiriro z’uyu mwaka w’imikino ntizabaye nziza kuri iyi kipe yatangiye Shampiyona itsindwa na IPRC Kigali ndetse bikarangira itanakinnye Igikombe cy’Intwari 2020 kubera ikibazo cya Nijimbere Guilbert n’ubu kitarakemuka, ikaba yaratandukanye kandi n’Umunya- Kenya Makiadi Ongea.

Byasaga naho n’ubundi itaribona neza mu kibuga hamwe n’abatoza Mukurariranda Jean Claude na Munyaneza Edouard, aho iminota ine y’agace ka mbere k’uyu mukino bahuragamo na APR BBC, yashize nta nota barinjiza mu gihe ikipe y’ingabo yari imaze gutsinda amanota 10.

Amanota atatu ya mbere yatsinzwe na Mugabe Aristide ni yo yagaruye Patriots BBC mu mukino, akurikirwa n’andi ane yatsinzwe na Hagumintwari Steve, ariko ntibyabuza ko agace ka mbere karangira APR iyoboye n’amanota 16-11.

APR BBC yayoboye kandi agace ka kabiri, amakipe yombi ajya kuruhuka iri imbere n’amanota 24-21 mu gihe aka gatatu karangiye irusha Patriots BBC inota rimwe (44-43).

Agace ka nyuma Patriots BBC yatsinzemo amanota 21-13 ni ko katandukanyije amakipe yombi, umukino urangira harimo ikinyuranyo cy’amanota arindwi (64-57).

Ndayisaba Ndizeye Dieudonné wa Patriots BBC yatsinze amanota 17 muri uyu mukino, akurikirwa na Hagumintwari Steve bakinana ndetse na Niyonkuru Pascal Kaceka wa APR, bombi batsinze amanota 15.

Uyu mukino wari wabanjirijwe n’uwo Espoir BBC yatsinzemo Shoot For Stars amanota 118-68 arimo 44 ya Kasongo wa Espoir BBC.

Imikino iteganyijwe kuri uyu wa Gatandatu

  • Rusizi BBC vs UR CMHS (Rusizi, 9h00)
  • RP- IPRC Kigali BBC vs RP- IPRC Musanze , (Amahoro, 12h00)
  • RP-IPRC Huye BBC vs Tigers BBC, (Huye, 13h00)
  • UR Huye BBC vs 30 Plus BBC, (Huye, 14h00)
Kasongo Aubin Junior atanga umupira kuri Hagumintwari Steve
Hagumintwari ufite umupira, ni umwe mu bafashije cyane Patriots BBC kuri uyu wa Gatanu
Kasonga ashaka uko arenza umupira Mutabaruka Victor wa APR BBC
Irutingabo Fiston wa APR agerageza guhagarika Ndizeye Dieudonne
Mutabaruka Victor ateresha umupira nabi Kasongo Junior ugatakara
Ubwitabire bw'abafana kuri uyu wa Gatanu bwari hasi
Hagumintwari Steve asimbuka ngo ashyire umupira mu nkangara mu gihe abakinnyi ba APR BBC barimo Niyonkuru Pascal bashakaga uko bamuhagarika
Iyakaremye Emmanuel wa APR ashaka uko acenga Sagamba Sedar
Munyaneza Eric asimbuka ngo ashyire umupira mu nkangara ubwo yari hagati y'abakinnyi ba Patriots BBC
Niyonkuru Pascal atwara umupira Ndayisaba Ndizeye Dieudonne
Sangwe Armel acenga abakinnyi ba Patriots BBC mu mukino wabaye kuri uyu wa Gatanu
Sangwe Armel areba niba hari mugenzi we yahereza umupira ubwo yari asatiriwe na Sagamba Sedar

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza