00:00:00 IGIHE NETWORK KN KINYARWANDA EN ENGLISH FR FRANCAIS

Nshobozwabyosenumukiza mu nzira zo gusinyira ikipe yo muri Cap-Vert

Yanditswe na IGIHE
Kuya 7 June 2022 saa 04:34
Yasuwe :

Umukinnyi wa REG BBC n’Ikipe y’Igihugu y’u Rwanda ya Basketball, Nshobozwabyosenumukiza Jean Jacques Wilson, ashobora gusinyira Ikipe ya Mindelo Monstro yo muri Cap-Vert.

Ku wa 1 Kamena 2022 ni bwo Mindelo Monstro ibinyujije ku rukuta rwayo rwa Instagram yatangaje ko mu bakinnyi izakinisha mu irushanwa ryo mu mpeshyi harimo n’Umunyarwanda Nshobozwabyosenumukiza.

Abandi bakinnyi iyi kipe yahisemo barimo Devin Smith, Jose Tonet na Mike Mcclary.

Nshobozwabyosenumukiza w’imyaka 23 yigaragaje cyane ubwo Ikipe ya REG BBC yakinaga imikino y’amatsinda yayihesheje itike yo kugera muri ¼ cya Basketball Africa League, muri Sahara Conference. Iyi mikino yabereye mu Mujyi wa Dakar muri Sénégal.

Iyi kipe yari ihagarariye u Rwanda mu Irushanwa rya Basketball Africa League, BAL, yasezerewe na FAP yo muri Cameroun muri 1/4 cy’irangiza iyitsinze amanota 66-63; mu mukino wabaye ku wa 21 Gicurasi 2022.

Nshobozwabyosenumukiza biteganyijwe ko azakinira Mindelo Monstro yo muri Cap-Vert muri iyi mpeshyi ya 2022.

IGIHE yamenye ko irushanwa ’Summer League’ azakiniramo iyi kipe rishobora kumara amezi abiri, buri kipe yemererwa gukoresha abakinnyi yifuza.

Mu kiganiro kigufi yagiranye na IGIHE, Nshobozwabyosenumukiza yavuze ko yatoranyijwe na Mindelo Monstro ariko nta masezerano aragirana na bo.

Yagize ati "Nta masezerano dufitanye, barantoranyije ariko nibimara kunozwa, nshobora gusinyana na bo mu kwa Karindwi.’’

Yavuze ko kuba yatekerejweho bitanga icyizere ku hazaza he nk’umukinnyi wa Basketball. Yagize ati "Ni byiza, nk’umukinnyi ni intambwe ishimishije gukina hanze y’igihugu cyawe. Ni amahirwe umuntu aba agomba gukoresha neza, akareba ko yagera ahandi.’’

Mindelo Monstro yiganjemo abakinnyi bakomoka mu gace ka Sao Vicente ari nako ibarizwamo muri Cap-Vert.

Uyu mukinnyi ari mu bahamagawe mu Ikipe y’u Rwanda izakina amajonjora y’Igikombe cy’Isi.

U Rwanda ni rwo ruzakira imikino y’amatsinda yo gushaka itike y’Igikombe cy’Isi cya 2023 izabera mu Mujyi wa Kigali ku wa 1-3 Nyakanga 2022.

Ikipe y’Igihugu y’u Rwanda iri mu Itsinda rya Kabiri [B], irihuriyemo na Sudani y’Epfo, Tunisie na Cameroun.

Imikino ya mbere muri uru rugendo yabereye mu Mujyi wa Dakar muri Sénégal kuva tariki 26 Ugushyingo 2021. U Rwanda rwasoje nta mukino rutsinze.

Sudani y’Epfo yasoje ari iya mbere n’amanota atandatu, Tunisie ya kabiri n’amanota atanu, Cameroun ifite amanota ane mu gihe u Rwanda rwacyuye amanota atatu.

Nshobozwabyosenumukiza Jean Jacques Wilson yasinyiye ikipe yo muri Cap-Vert

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .