Uyu muhango watangiye gukorwa mu 1963 ubwo Perezida wa Leta Zunze Ubumwe za Amerika icyo gihe, John Fitzgerald Kennedy yakiraga mu biro bye Boston Celtics yari yegukanye NBA.

Kuri iyi nshuro hari hatahiwe Celtics yacyegukanye umwaka ushize, aho abagize iyi kipe batemberezwa ibiro by’Umukuru w’Igihugu.

Mu ijambo rye nyuma yo gushyikirizwa umwambaro w’iyi kipe uriho nimero 46 igaragaza ko ari Perezida wa 46 wayoboye Amerika, Joe Biden yavuze ko yishimiye iki gikombe cyane.

Ati “Celtics ntabwo ari ikipe ya Basketball gusa ahubwo ni inzira y’ubuzima.”

Yagaragaje ko yishimiye kwakira iyi kipe bitiranwa kuko (Celtic) ari izina yitwa n’abamurindira umutekano.

Biden kandi yashimye umutoza wa Boston Celtics, Joe Mazzulla wakoze amateka yo kwegukana NBA ari muto ku myaka 35 gusa.

Yagize ati “Hari igihe nanjye nari umusenateri muto, ariko naje kuba Perezida mukuru wayoboye Amerika. Gusa nishimira kuba umuto mwiza.”

Boston Celtics yegukanye Igikombe cya Shampiyona yaherukaga mu 2008 yuzuza 18 ari nayo ifite byinshi mu mateka.

Perezida Biden yakiriye Boston Celtics mu biro bye

Perezida Joe Biden ashyikirizwa igikombe Celtics yegukanye

Jayson Tatum na Derrick White nibo bashyikirije Perezida Biden umwambaro wa nimero 46