Menya byinshi kuri Shema Maboko wagizwe Umunyamabanga Uhoraho muri Minisiteri ya Siporo

Yanditswe na Ndayikunda Josué
Kuya 5 Ugushyingo 2019 saa 03:05
Yasuwe :
0 0

Umusifuzi mpuzamahanga wa Basketball, Shema Maboko Didier, yaraye agiriwe icyizeye na Perezida Paul Kagame, agirwa Umunyamabanga Uhoraho muri Minisiteri ya Siporo.

Shema Maboko wari usanzwe ari Umuyobozi wa Tekinike mu Ishyirahamwe ry’Umukino wa Basketball mu Rwanda (FERWABA), yabonye izuba tariki ya 15 Werurwe 1980 mu karere ka Nyarugenge.

Ni mwene Ndarusanzwe Augustin na Musabyemariya Genevieve, akaba umwana wa kabiri mu muryango w’abahungu bane n’umukobwa umwe.

Shema yashakanye na Hermine E’Geirma bamenyaniye muri Kaminuza, bakaba bafitanye abana babiri b’abakobwa.

Amashuri abanza yayize muri Camp Kigali, icyiciro rusange cy’amashuri yisumbuye acyigira kuri Saint André mbere y’uko akomereza muri Ecole Zairoise aho yakurikiye amasomo y’Uburezi.

Mu 2007, Shema Maboko yasoje icyiciro cya kabiri cya kaminuza muri Kaminuza y’u Rwanda mu ishami rya Siporo mu gihe kandi ari umwe mu banyarwanda batatu bize icyiciro cya gatatu muri Kaminuza ya Tsukuba yo mu Buyapani.

Ibihe by’ingenzi mu mukino wa Basketball nk’umukinnyi

Mu 1991 ubwo yari afite imyaka 11 yiga mu mwaka wa mbere w’amashuri yisumbuye, ni bwo Shema Maboko Didier yatangiye gukina umukino wa Basketball.

Mu 1998, yagiye gukinira ikipe ya Kicukiro yitorezaga mu Gatenga ari naho yamenyeye ko Ishyirahamwe ry’Umukino wa Basketball mu Rwanda ryari riri gutegura amahugurwa y’abasifuzi.

Shema Maboko Didier nk’umusifuzi

Shema yatangiye gusifura mu mikino yahuzaga ibigo by’amashuri, asifura umukino wa mbere wa shampiyona ya Basketball mu 1999 afite imyaka 19, wahuje Lycee de Kigali y’abakobwa na Mirroir BBC ukabera ahahoze ari kuri Café Impala, ubu hari Serena Hotel.

Mu 2004, nibwo Shema yasifuye umukino wa mbere mpuzamahanga mu mikino yahuzaga imijyi yo muri Afurika y’Iburasirazuba yabereye i Kigali, yongera mu 2007 asifura imikino ya ANOCA yabereye i Nairobi muri Kenya.

Mu 2007 kandi Shema yabonye impamyabumenyi mu gusifura imikino ya Basketball ku rwego rw’akarere, mu 2008 abona impamyabumenyi yo ku rwego rw’Ishyirahamwe ry’Umukino wa Basketball ku Isi, FIBA, ayikuye muri Zambia, aba umunyarwanda wa kabiri wari ufite iyo mpamyabumenyi nyuma ya Rwabuhihi Innocent.

Muri Nyakanga 2009, Shema yasifuye mu mikino y’igikombe cy’Uburayi cy’abatarengeje imyaka 18 cyabereye mu Bufaransa, nyuma aza gusifura andi marushanwa y’igikombe cya Afurika nka Zove V n’ayandi mu byiciro bitandukanye.

Shema Maboko Didier abaye umunyamabanga uhoraho muri Minisiteri ya Siporo agifite inzozi zo kuzasifura imikino Olempiki na Shampiyona y’Isi.

Shema Maboko Didier asanzwe ari umusifuzi mpuzamahanga wa Basketball
Shema Maboko w'imyaka 39 ni we wagizwe Umunyamabanga Uhoraho muri Minisiteri ya Siporo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza