MAC Classic yabaye umuhanzi wa mbere ukoze indirimbo isingiza Basketball y’u Rwanda

Yanditswe na Eric Tony Ukurikiyimfura
Kuya 14 Mutarama 2020 saa 09:35
Yasuwe :
0 0

Umuhanzi ukizamuka mu muziki Nyarwanda, Ndayisenga Jean de Dieu uzwi nka MAC Classic, yakozwe ku mutima n’uburyo umukino wa Basketball uri kuzamuka mu Rwanda bimutera gukora mu nganzo awuhimbira indirimbo ya mbere iwusingiza yise “We Made it” yasohokanye n’amashusho yayo.

Nubwo umukino wa Basketball ugenda utera imbere mu Rwanda, abahanzi bakomeye ntibakunze kuririmba indirimbo ziwurata nk’uko byagiye bigenda ku baraperi bakomeye muri Amerika ariyo mpamvu MAC Classic yabimburiye abandi gukora indirimbo isingiza uyu mukino.

Aganira n’itangazamakuru, MAC Classic yavuze ko kuba Abanyarwanda bari gutera imbere mu mukino wa Basketball n’abafana bakaza ku bibuga ku bwinshi ariyo mpamvu yahisemo gukora iyi ndirimbo ya mbere ivuga kuri uyu mukino mu Rwanda.

Yagize ati “Iyi ndirimbo nayikoze ngamije gushyigikira umukino wa Basketball mu Rwanda no gutera ingabo mu bitugu abakinnyi b’Abanyarwanda bamaze gutera intambwe ishimishije.’’

MAC Classic yavuze ko kuba abaye umuhanzi wa mbere mu Rwanda no ku Isi uririmbye indirimbo isingiza Basketball y’u Rwanda ari ishema kuri we ndetse ngo yishimiye ko yatanze umusanzu we nk’umuhanzi mu gushyigikira Basketball y’u Rwanda.

Agashya kagaragaye mu mashusho y’indirimbo ya mbere isingiza Basketball y’u Rwanda ni itsinda ry’ababyinnyi bakundwa na benshi ku mikino itandukanye ya Basketball bazwi nka African Cheer Leaders n’abandi ba Urban Dance Crew.

Iyi ndirimbo yagaragayemo kandi abakinnyi bakomeye muri Basketball y’u Rwanda barimo Shyaka Olivier na Nshobozwabyosenumukiza Wilson bakinira REG BBC n’Ikipe y’Igihugu.

Umuhanzi MAC Classic yakoze izindi ndirimbo zirimo nka "Turn up" na "Slay Queen".

MAC Classic yabaye umuhanzi wa mbere wakoze indirimbo isingiza Basketball y’u Rwanda
Ndayisenga Jean de Dieu uzwi nka MAC Classic, yakozwe ku mutima n’uburyo umukino wa Basketball uri kuzamuka mu Rwanda
Aba babyinnyi bamaze kugwiza igikundiro cy'abakurikirana Basketball y'u Rwanda
Amwe mu mashusho y'iyi ndirimbo yafatiwe kuri Club Rafiki i Nyamirambo, ikibuga cyavuguruwe ku nkunga ya Masai Ujiri uyobora Toronto Raptors ikina muri Shampiyona ya Basketball muri Leta Zunze Ubumwe za Amerika (NBA)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza