LA Lakers yageze mu mikino ya nyuma ya NBA nyuma y’imyaka 10

Yanditswe na Eric Tony Ukurikiyimfura
Kuya 27 Nzeri 2020 saa 10:41
Yasuwe :
0 0

LeBron James yafashije Los Angeles Lakers kugera mu mikino ya nyuma ya NBA nyuma y’imyaka 10, itsinze Denver Nuggets amanota 117-107 mu mukino wabaye mu ijoro ryakeye.

Iyi ntsinzi yafashije LA Lakers gusezerera Nuggets ku mikino 4-1 muri irindwi ishoboka, muri play-offs zo mu Gace k’Uburengerazuba.

LeBron James yigaragaje muri uyu mukino yatsinzemo “triple double”, igizwe n’amanota 38 arimo 16 yo mu gace ka gatatu, imipira 16 yasamye ivuye ku nkangara n’iyindi 10 yatanze kuri bagenzi be ikavamo andi manota.

Uyu mugabo w’imyaka 35, kuri ubu agiye gukina imikino ya nyuma ya NBA ku nshuro ya 10, ikaba ya mbere ari kumwe na Lakers.

Ni inshuro ya 32 ikipe ya LA Lakers igeze muri iyi mikino ya nyuma yo guhatanira Shampiyona ya NBA, aho izahura n’ikipe izakomeza mu Burasirazuba hagati ya Boston Celtics na Miami Heat.

Miami Heat iyoboye n’imikino 3-2, ni mu gihe umukino wa gatandatu uteganyijwe mu ijoro rishyira ku wa Mbere.

Ubwo Lakers yaherukaga kugira ibihe byiza mu mikino ya nyuma ya NBA, yahuye na Celtics, aho yari iyobowe na nyakwigendera Kobe Bryant.

LeBron James yavuze ko bakoze ibishoboka byose ngo bagere mu mikino ya nyuma mu rwego rwo guha icyubahiro Kobe Bryant waguye mu mpanuka ya kajugujugu muri Mutarama uyu mwaka.

Ati “Buri gihe iyo wambaye amabara ya Lakers, utekereza ibigwi bye. Uramutekereza ndetse n’icyo yari avuze kuri iyi kipe yakiniye imyaka isaga 20.”

“Ntewe ishema cyane no kuba ndi muri iyi kipe iri kugaruka aho yahoze, aribyo gukinira igikombe.”

Umutoza wa Lakers, Frank Vogel yashimiye LeBron James uburyo yitwaye mu mukino yabahuje na Nuggets yagiye igaragaza kwihagararaho uyu mwaka.

Dwyane Wade wakinanye James ndetse n’umunyabigwi wa Lakers, Earvin Magic Johnson, nabo bashimiye uyu mukinnyi ku buryo yitwaye.

Uretse LeBron James, undi mukinnyi wigaragaje muri uyu mukino ni Anthony Davis watsinze amanota 27, akagerana na Lakers mu mikino ya nyuma mu mwaka we wa mbere nyuma yo kuyigeramo avuye muri New Orleans.

LeBron James w’imyaka 35 agiye gukina imikino ya nyuma ya NBA ku nshuro ya 10, ikaba ya mbere ari kumwe na Lakers
LeBron James yigaragaje cyane muri uyu mukino
Iyi ntsinzi yafashije LA Lakers gusezerera Nuggets ku mikino 4-1
Byari ibyishimo ku bakinnyi ba LA Lakers
LA Lakers yageze mu mikino ya nyuma ya NBA nyuma y’imyaka 10
Ni inshuro ya 32 ikipe ya LA Lakers igeze muri iyi mikino ya nyuma yo guhatanira Shampiyona ya NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .