00:00:00 IGIHE NETWORK KN KINYARWANDA EN ENGLISH FR FRANCAIS

Kyrie Irving mu mazi abira azira gupfobya Jenoside yakorewe Abayahudi

Yanditswe na IGIHE
Kuya 31 Ukwakira 2022 saa 02:30
Yasuwe :

Kyrie Irving ukinira Brooklyn Nets yikomwe n’abarimo Perezida w’iyi kipe, Joe Tsai amushinja gushyigikira ibikorwa byo gupfobya Jenoside yakorewe Abayahudi.

Ku wa Kane tariki 27 Ukwakira 2022, Irving yasangije abamukurikira kuri Twitter link ya filimi yitwa “Hebrews to Negroes: Wake Up Black America,” yakinwe hagendewe ku gitabo cya Ronald Dalton cyitwa gutyo, cyafashwe nk’igipfobya Jenoside yakorewe Abayahudi.

Ibi byatumye Kyrie Irving yikomwa n’umuyobozi wa Brooklyn Nets akinira ndetse n’ubuyobozi bwa NBA.

Umuyobozi wa Brooklyn Nets, Joe Tsai yagize ati "Nababajwe n’uko Kyrie asa n’aho ashyigikiye filimi ishingiye ku gitabo cyuzuyemo urwango no gupfobya Jenoside yakorewe Abayahudi.”

“Ndashaka kwicarana nawe nkareba ko yumva ko ibi bitubabaza twese, kandi nk’umwizera, ni bibi guteza imbere urwango rushingiye ku bwoko cyangwa idini. Ibi birenze Basketball.”

Ku wa Gatandatu, Kyrie Irving wamamaye muri Brooklyn Nets yanditse ku rubuga rwa Twitter ahakana ibyo ashinjwa, avuga ko yashakaga kuvuga ko atigeze asuzugura imyizerere y’idini y’umuntu uwo ari we wese nyuma yuko nyir’ikipe ye amwamaganye avuga ko ashyigikiye ibikorwa bibiba urwango.

Ati “Njye ndi umuntu wuhaba amadini yose,sinshobora gusuzugura imyizerere ya buri umwe. Ibyo ndigushinjwa ntaho bihuriye n’ubuzima mbamo buri munsi.”

Bukeye bwaho ikipe ye Brooklyn Nets na NBA byatangaje ko byitandukanyije na Irving.

NBA yo yatangaje ko yamaganye ibikorwa byose bifitanye isano n’urwango kuko bihabanye n’indangagaciro z’uburinganire, gushyira hamwe no kubahana.

Umwaka ushize Irving ntiyakinaga imikino yo mu rugo kubera kwanga kwikingiza Covid 19,ibintu byatumye Nets yanga kumwongerera amasezerano muri iyi mpeshyi bityo akaba ari mu mwaka we wa nyuma muri iyi kipe.

Ibi bikorwa byo gupfobya Jenoside y’Abayahudi biheruka no kugaragara ku muhanzi Kanye West cyangwa Ye byatumye Adidas ihagarika ubufatanye yari ifitanye nawe, ihagarika gukora ibicuruzwa bya Yeezy, kumwishyura hamwe n’amasosiyete ye.

Kyrie Irving ari mu mazira abira azira gupfobya Jenoside yakorewe Abayahudi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .