00:00:00 IGIHE NETWORK KN KINYARWANDA EN ENGLISH FR FRANCAIS

Kayonza: Uko umukino wa Basketball wakuye mu bwigunge abagore barenga 800

Yanditswe na Hakizimana Jean Paul
Kuya 6 July 2022 saa 11:48
Yasuwe :

Abagore barenga 806 bo mu Murenge wa Rukara mu Karere ka Kayonza, bamaze iminsi bahurizwa hamwe bakora siporo yo gukina Basketball inshuro ebyiri mu cyumweru, ubundi bagatangirwa ubwisungane mu kwivuza mu rwego rwo kubafasha kurushaho kugira ubuzima bwiza.

Ntabwo bisanzwe kubona umugore w’imyaka irenga 50 ahagana saa Cyenda z’amanywa mu cyaro, mu kibuga cya Basketball bamwe bambaye imyenda ya siporo mu gihe abandi barengejeho ibitenge, bose intero ari imwe: Kwidagadura bakina Basketball.

Uyu mukino bawukundishijwe n’Umuryango ‘Shooting Touch’ ukorera muri aka Karere, aho ahuriza hamwe aba bagore bagakora siporo maze abatishoboye muri bo bagatangirwa mituweli bo n’imiryango yabo.

Abaganiriye na IGIHE bavuze ko iyi siporo yatumye bava mu bwigunge ndetse ngo inabafasha kwirinda zimwe mu ndwara zitandukanye.

Uwimana Claudine yavuze ko mu gihe cya Covid-19 bahabwaga ibyo kurya ndetse bakanatangirwa ubwisungane mu kwivuza babikesha gukora siporo.

Ati “Icya mbere umubiri wanjye usigaye ugubwa neza, nsigaye mpura n’abandi tukaganira tukungurana ibitekerezo, ikindi ubu sinkirwaragurika kuko nkora siporo bakananyongereraho kuntangira mituweli.”

Umuhoza Pholomide utuye mu Mudugudu wa Karubamba mu Kagari ka Rukara, we avuga ko siporo yatumye ahura na bagenzi be babasha gusabana ndetse binamufasha kuruhura ubwonko.

Ati “ Mu gitondo njya mu kazi gasanzwe nkahinga nkanasarura, ku mugoroba rero nza hano nkakina Basketball na bagenzi banjye bikamfasha cyane.”

Mujawiyera Laetitia w’imyaka 49, yavuze ko gukora siporo byatumye ava mu bwigunge abona ahantu aganirira na bagenzi be kuburyo ngo atakigira irungu.

Yagize ati “Siporo yangejeje kuri byinshi ngorora umubiri mpura n’abavandimwe, itwigisha amasomo anyuranye y’ubuzima kandi banantangirira mituweli.”

Karwanira Moses utoza aba bagore avuga ko nibura mu cyumweru atoza abagore barenga 800. Babaciyemo ibyiciro bitatu bituma bakora inshuro ebyiri mu cyumweru kuri buri cyiciro.

Umunyaabanga Nshingwabikorwa w’Umurenge wa Rukara, Nyirabizeyimana Immaculée, yabwiye IGIHE ko impamvu Shooting Touch yishyurira imiryango y’aba bagore mituweli, ari ukugira ngo bafashwe gukomeza kugira ubuzima bwiza no kurushaho kubakundisha siporo.

Ati “Kuba bakora siporo bibafasha kwirinda ziriya ndwara zitandura kuko siporo ni ubuzima. Ikindi bahurira hamwe nibura buri kwezi bakigishwa ku kubaka umuryango utekanye, kurwanya amakimbirane mu muryango ndetse bikanabafasha gutinyuka bakajya mu matsinda abafasha kwiteza imbere no kwitabira gahunda za leta.”

Kuri ubu abagore 806 nibo bakina uyu mukino wa Basketball abishyuriwe ubwisungane mu kwivuza ni imiryango 700 igizwe n’abaturage 3500.

Iyo bakigera ku kibuga babacamo amatsinda mato abafasha gukina neza
Hari abaza gukina bambaye imyenda ya siporo bakanarenzaho ibitenge
Bamwe ntibari basobanukiwe ibyiza bya siporo ariko ni abahamya babyo
Aba bagore bavuga ko bishimiye guhurizwa hamwe n'ubufasha bahabwa
Uwimana Claudine avuga ko siporo yamurinze ubwigunge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .