00:00:00 IGIHE NETWORK KN KINYARWANDA EN ENGLISH FR FRANCAIS

Karl-Anthony wamamaye muri NBA amaze gupfusha abanyamuryango barindwi barimo na nyina bazize COVID-19

Yanditswe na IGIHE
Kuya 8 Ukuboza 2020 saa 01:30
Yasuwe :
0 0

Umukinnyi w’icyamamare muri Shampiyona ya Baskteball ya NBA, Karl-Anthony Towns ukinira Minnesota Timberwolves, yavuze ko abantu barindwi bo mu muryango we barimo na nyina, bamaze guhitanwa n’icyorezo cya COVID-19 cyibasiye Isi.

Karl-Anthony Towns agiye gukina muri NBA umwaka wa gatandatu.

Mu kiganiro yagiranye n’abanyamakuru ku wa Gatanu hifashishijwe ikoranabuhanga ry’amashusho, uyu mukinnyi yavuze ko ibihe bya COVID-19 bitamworoheye kuko yapfushijemo abanyamuryango benshi barimo na nyina.

Ati “Ntabwo byanyoroheye, nabanje gutakaza umubyeyi wanjye.”

Nyina wa Towns, Jacqueline Towns, yitabye Imana muri Mata uyu mwaka, azize COVID-19.

Uyu mukinnyi yahishuye ko uretse uwo mubyeyi, hari n’abandi banyamuryango be batandatu bamaze guhitanwa n’icyo cyorezo.

Ati “Ijoro ryakeye bampamagaye bambwira ko napfushije marume. Numva ntoroherwe n’ubuzima.”

Towns yavuze ko agerageza gufasha umuryango we kubaho utuje. Se, Karl-Anthony Towns Sr, na we yanduye COVID-19, ariko arayikira.

Ati “Nabonye amasanduku menshi y’abapfuye mu mezi arindwi cyangwa umunani ashize. Gusa mfite abantu mu muryango wanjye ndetse n’uwa mama, banduye COVID-19. Ninjye ugomba gushaka ibisubizo, nkabafasha kubaho neza ari bazima.”

Towns yavuze ko bitazamwohera kongera gukina ku rwego yari ariho kuko mu batumye akunda gukina Basketball harimo nyina wamushyigikiraga cyane ku kibuga.

Ati “Nkina uyu mukino kuko nakundaga kubona abanyamuryango banjye bandeba ndi mu kibuga. Byaranshimishaga iyo nabonaga mama ari ku kibuga ndi gukina.”

“Ku bw’ibyo ntibizanyorohera gukina. Biragoye kuvuga aka kanya ko gukina ari byo byambera umuti. Sintekereza ko ari byo byaruhura umutima wanjye, gusa bimpa amahirwe yo kwibuka ibihe byiza nagize”

Ubwo nyina yashyirwaga mu bitaro by’indembe muri Werurwe, Towns yashyize amashusho kuri Instagram, asaba abantu kuzirikana ko icyorezo cya COVID-19 ari icyo kwirinda.

Ku wa 15 Werurwe, yatangaje ko azatanga inkunga y’ibihumbi 100$ ku ivuriro rya Mayo mu rwego rwo kurishyigikira mu gufata ibipimo bya COVID-19.

Towns akina muri NBA kuva mu 2016 ndetse amaze kugaragara mu bakinnyi b’intoranywa bakina “NBA All-Star” inshuro ebyiri.

Timberwolves akinira, izatangira shampiyona ya NBA ya 2020/21 ihura na Detroit Pistons ku wa 23 Ukuboza muri Target Center muri Minneapolis.

Karl-Anthony Towns ukinira Minnesota Timberwolves amaze gupfusha abanyamuryango barindwi bazize COVID-19
Nyina wa Towns, Jacqueline Towns, yitabye Imana muri Mata uyu mwaka, azize COVID-19.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .