Iserukiramuco rya Giants of Africa ryari guhuriza ibihugu 11 i Kigali ryasubitswe

Yanditswe na Eric Tony Ukurikiyimfura
Kuya 3 Kamena 2020 saa 01:23
Yasuwe :
0 0

Bitewe n’ingamba zafashwe mu kurengera ubuzima kubera icyorezo cya COVID-19, iserukiramuco rya mbere rya Giants of Africa ryagombaga kubera mu Rwanda muri Kanama uyu mwaka, ryimuriwe mu 2021.

Tariki ya 20 Gashyantare 2020 nibwo Perezida Kagame ari kumwe na Masai Ujiri, bamuritse iserukiramuco rya Giants of Africa rizabera i Kigali, rigahuza ibihugu 11. Byari biteganyijwe ko rizaba hagati ya tariki ya tariki ya 16 n’iya 22 Kanama 2020.

Kuri uyu wa 3 Kamena, Umuryango Giants of Africa watangijwe na Masai Ujiri usanzwe ari Umuyobozi wa Toronto Raptors yo muri NBA, wavuze ko iryo serukiramuco ryimuriwe mu 2021.

Wavuze ko “ubuzima n’imibereho myiza y’abafatanyabikorwa bawo, abatoza, abana bawubamo n’abaturage bagenerwa ibikorwa byawo ari cyo cy’ingenzi.”

“Mu byumweru bishize, ikipe y’ubuyobozi bwacu yakomeje gukurikirana uko COVID-19 ihagaze ndetse ivugana n’abafatanyabikorwa bacu n’abayobozi b’u Rwanda. Nubwo iki ari icyemezo kitoroshye, twiyemeje gukurikiza umurongo ngenderwaho n’amabwiriza yashyizweho n’Ishami ry’Umuryango w’Abibumbye ryita ku Buzima (WHO).”

Masai Ujiri wari mu Rwanda ubwo hamurikwaga iri serukiramuco muri Gashyantare, yavuze ko bizeye ko ubwo rizaba riba mu 2021, abana bazungukiramo byinshi byiza.

Ati “Imwe mu ntego z’iri serukiramuco ni uguhiriza hamwe imico itandukanye igize Afurika mu Rwanda. Guhana intera ni kimwe mu bifasha kurwanya iki cyorezo cyibasiye Isi kandi guhurira hamwe byaba bivuguruza ibyo inzobere mu by’ubuzima zishimangira ko twese dukora kugira ngo dufashe kugabanya iki cyorezo.”

“Urubyiruko rwo muri Afurika rukwiye ibyiza byacu kandi mu 2021 iserukiramuco rizabitanga.”

Umuyobozi Mukuru w’Ikigo cy’Igihugu cy’Iterambere (RDB), Clare Akamanzi, yavuze ko u Rwanda rwiteguye kwakira iri serukiramuco mu 2021.

Ati “U Rwanda rurajwe ishinga no guhangana na Covid-19 ndetse n’ingaruka zishingiye ku bukungu n’imibereho y’abaturage bacu. Tugomba guhagarika ibikorwa byinshi by’ingenzi ariko tugakora kugira ngo dukomeze kwitegura inama zishingiye ku ngendo mu gihe iki kibazo kizaba kirangiye.”

“Ubuyobozi bw’igihugu cyacu bwabaye ingirakamaro mu gushaka uko dutsinda iki cyorezo. Dutegereje kuzakira iserukiramuco rya mbere rya Giants of Africa i Kigali mu mwaka utaha.”

Giants of Africa ni gahunda igamije guteza imbere urubyiruko binyuze mu mukino wa Basketball. Abahungu n’abakobwa 200 bazitabira iserukiramuco rizabera i Kigali ni bo muri Sénégal, Mali, Nigeria, Cameroun, Repubulika Iharanira Demokarasi ya Congo, Sudani y’Epfo, Uganda, Rwanda, Tanzania, Kenya na Somalia.

Perezida Kagame (iburyo) na Masai Ujiri watangije umushinga wa Giants of Africa, ubwo hamurikwaga iri serukiramuco muri Gashyantare 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .