00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda mu nzira y’amahwa mu gushaka itike y’Igikombe cy’Isi cya Basketball

Yanditswe na Mihigo Saddam
Kuya 2 June 2022 saa 01:29
Yasuwe :

U Rwanda rugiye kwakira imikino y’amatsinda yo gushaka itike y’Igikombe cy’Isi cya 2023 iteganyijwe kubera mu Mujyi wa Kigali ku wa 1-3 Nyakanga 2022.

Ikipe y’Igihugu y’u Rwanda iri mu Itsinda rya Kabiri [B], irihuriyemo na Sudani y’Epfo, Tunisie na Cameroun.

Imikino ya mbere muri uru rugendo yabereye mu Mujyi wa Dakar muri Sénégal kuva tariki 26 Ugushyingo 2021. U Rwanda rwasoje nta mukino rutsinze.

Sudani y’Epfo yasoje ari iya mbere n’amanota atandatu, Tunisie ya kabiri n’amanota atanu, Cameroun ifite amanota ane mu gihe u Rwanda rwacyuye amanota atatu.

Ikipe y’u Rwanda yatsinzwe na Sudani y’Epfo amanota 68-56, itsindwa na Tunisie amanota 65-51 na Cameroun iyisubira iyitsinda ku manota 57-45.

Uyu musaruro uzashingirwaho mu kubara amanota yo gushaka amakipe atanu azahagararira Umugabane wa Afurika mu Gikombe cy’Isi.

Inzira iganisha u Rwanda mu Gikombe cy’Isi irafunganye

U Rwanda ni kimwe mu bihugu 16 bya Afurika biri mu matsinda ane agizwe n’ibihugu bine muri buri tsinda nk’uko tombola yabereye i Kigali mu mpera za Nyakanga 2021 yabigaragaje.

Ibihugu 16 biri mu matsinda yo gushaka itike y’Igikombe cy’Isi ni ayari mu mikino ya nyuma y’Igikombe cya Afurika yabereye mu Rwanda mu 2021.

Muri buri tsinda hazazamuka amakipe atatu bityo haboneke amakipe 12 ya nyuma hashingiwe uko yitwaje mu ijonjora rya mbere.

Aya makipe azashyirwa mu matsinda abiri, buri tsinda rijyemo ibihugu bitandatu.

Mu ijonjora rya kabiri rizaba rigizwe n’ibihugu 12, buri gihugu kizahura n’ikindi, imikino na yo izaba mu byiciro bibiri kugira ngo buri kimwe cyuzuze imikino itandatu.

Imikino ibanza izakinwa muri Kanama 2022 no muri Gashyantare 2023.

Nyuma y’imikino ya kabiri y’amakipe 12 ari mu matsinda abiri izakinwa muri Gashyantare 2023, hazarebwa ibihugu bibiri bya mbere bityo bibe ibihugu bine.

Nyuma hazarebwa ibihugu bibiri byasoje ku mwanya wa gatatu muri buri tsinda, igihugu kizaba cyaragize umusaruro mwiza kiyongere kuri bya bindi bine bibe ibihugu bitanu.

Ibyo bihugu bitanu ni byo bizahagararira Umugabane wa Afurika mu mikino y’Igikombe cy’Isi cya 2023.

Kugira ngo u Rwanda ruzinjire mu bihugu 12 bizajya mu ijonjora ry’amatsinda abiri, rurasabwa nibura kuva ku mwanya wa nyuma ruriho mu Itsinda B. Ni ukuvuga kwitwara neza mu mikino izabera muri Kigali.

Mu mikino izabera muri BK Arena muri Nyakanga 2022, u Rwanda rurasabwa gutsinda imikino yose rugategereza uko bizajya bigenda hagati y’andi makipe.

Urugendo rwo gushaka ibihugu bizahagararira Afurika mu Gikombe cy’Isi ruzarangira tariki 23 Gashyantare 2023.

Imikino ya nyuma y’Igikombe cy’Isi cya Basketball izabera mu Buyapani, Indonesie na Philippines kuva tariki 25 Kanama kugeza ku wa 10 Nzeri 2023.

Bigendanye n'uko u Rwanda rwitwaye i Dakar, rwisize mu mibare igoye yo kubona itike igana mu Gikombe cy'Isi
Gasana Kenneth Hubbert ni umwe mu bakinnyi barambye mu Ikipe y'Igihugu batarayibona ibona itike y'Igikombe cy'Isi
Ndizeye Ndayisaba Dieudonné ni umwe mu bakinnyi bahamagawe n'Ikipe y'Igihugu mu rugendo rwo gushaka itike y'Igikombe cy'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .