Inkweto Michael Jordan yakinanye mu 1985 zagurishijwe miliyoni 595 Frw muri cyamunara

Yanditswe na Bukuru JC
Kuya 14 Kanama 2020 saa 02:32
Yasuwe :
0 0

Umuguru w’inkweto zambawe n’igihangange mu mukino wa Basketball, Michael Jordan, zaguzwe $615,000 ni ukuvuga miliyoni zirenga 595 z’amafaranga y’u Rwanda, muri cyamunara yabaye kuri uyu wa Kane.

Izi nkweto zakozwe n’uruganda rwa Nike zizwi nka Air Jordan 1, zakoreshejwe na Michael Jordan mu mukino wa gishuti ikipe ye ya Chicago Bulls yakinnye mu 1985 mu Butaliyani. Zaciye agahigo ko kuba inkweto za siporo zihenze mu mateka.

Muri rusange, inzu ya Christies yagurishije izi nkweto z’umutuku n’umweru, imaze kugurisha imiguru icyenda y’inkweto za Michael Jordan, mu kwishimira imyaka 14 yamaze muri Chicago Bulls.

Michael Jordan afatwa nk’umukinnyi mwiza w’ibihe byose muri Basketball, aho mu myaka ya 1980 kugeza 1990, yagize uruhare runini mu kumenyekanisha shampiyona ya Basketball muri Leta Zunze Ubumwe za Amerika (NBA).

Christies yatangaje izi nkweto ari zo za Michael Jordan zigurishijwe menshi. Izindi ze zagurishijwe ni Air Jordan 7 zagurishijwe $112,500, Air Jordan 10 zagurishijwe $8,750. Hari kandi Jordan 14 zagurishijwe $21,250.

Umwaka ushize, rwiyemezamirimo w’umunya-Canada, Miles Nadal, yaguze inkweto zo mu bwoko bwa Nike, Adidas na Air Jordan zari zashyizwe mu cyamunara na Sotheby’s ku $850,000.

Muri Gicurasi hagati nibwo izindi nkweto za Air Jordan 1 zambawe na Michael Jordan, zaguzwe $560 000, aka gahigo kakaba kahise gakurwaho mu mezi atatu gusa. Imiguru icyenda Jordan yakinishije imaze kugurishwa $931 875.

Izi nkweto zaciye agahigo ko kugurwa ibihumbi $615
Michael Jordan ni umwe mu bakinnyi b'ibihangange bakinnye Basketball

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .