Imbere ya Perezida Kagame, Patriots BBC yatsinze GNBC igera muri ½ (Amafoto)

Yanditswe na Eric Tony Ukurikiyimfura
Kuya 20 Ukuboza 2019 saa 07:30
Yasuwe :
0 0

Patriots BBC ihagarariye u Rwanda mu mikino yo gushaka itike y’irushanwa rya Basketball Africa League, yatsinze GNBC yo muri Madagascal amanota 94-88 habanje kwitabazwa iminota y’inyongera mu mukino usoza iyo mu itsinda A ry’ijonjora rya kabiri rihuje amakipe umunani yo mu gace k’iburasirazuba.

Uyu mukino warebwe na Perezida Kagame wamuritse ikirango cy’iri rushanwa rishya rya Basketball Africa League, igikorwa cyabereye muri Kigali Arena iri kuberamo imikino.

Patriots BBC yagowe n’intangiriro z’umukino, itsindwa na GNBC mu gace ka mbere amanota 14-11, ariko mu gace ka kabiri ikuramo amanota atatu yarushwaga, amakipe yombi ajya kuruhuka ari 32-32.

Iyi kipe yo muri Madagascar yagaragazaga gusatira cyane, yeretse Patriots BBC ko atari ikipe isanzwe ubwo yatsindaga agace ka gatatu ku manota 27-17, ibi byatumye hajyamo ikinyuranyo cy’amanota 10 (49-59).

Abatoza ba Patriots BBC bahinduye umukino mu gace ka nyuma, iyi kipe ikomeza gukina ishaka uko yagabanya ikinyuranyo ariko ikagorwa n’Abanya-Madagascar ahubwo bakomezaga kucyongera dore ko ubwo haburaga iminota ibiri n’amasegonda 12, harimo ikinyuranyo cy’amanota 12.

Nijimbere Guibert na Kaje Elie binjiye muri iyi minota ya nyuma mu mwanya wa George Blakeney na Sagamba Sedard, bafatanyije n’abarimo Hagumintwari Steve na Kenneth Gasana kuzamura amanota kugeza ubwo hasigaragamo amanota abiri (78-80) habura amasegonda 18.

Sagamba Sedar yahise asubira mu kibuga asimbuye Nijimbere maze ku mupira yahawe na Mukama Victor, atsinda amanota atatu yatumye uduce tune turangira amakipe yombi anganya amanota 81-81.

Iminota itanu yongereweho, yasize Patriots BBC ikosoye GNBC iyitsinda amanota 94-88 ndetse igera muri ½ itsinze imikino yayo yose uko ari itatu yo mu itsinda A, igira amanota atandatu. GNBC na yo yabonye itike ya ½ kuko yazamutse ifite amanota atanu ku mwanya wa kabiri.

Undi mukino wabaye muri iri tsinda, warangiye UNZA Pacers yo muri Zambia, itsinze KJT yo muri Tanzania amanota 69-55 ariko amakipe yombi arasezererwa.

Mu itsinda B, Ferroviao Maputo yo muri Mozambique, yazamutse iyoboye itsinda B n’amanota atanu nyuma yo gutsindwa na KPA yo muri Kenya amanota 79-69 mu gihe City Oilers yo muri Uganda na yo yazamutse ari iya kabiri n’amanota atanu nyuma yo gutsinda Cobra yo muri Sudani y’Epfo amanota 108-71.

KPA yo muri Kenya yakinnye umukino wayo wa mbere ejo hashize nyuma yo kugera i Kigali itinze kubera amikoro, irakina umukino wa kabiri na Cobra kuri uyu wa Gatanu ariko ntacyo uhindura ku makipe azakina ½.

Muri ½, Patriots BBC izongera guhura na City Oilers yo muri Uganda zari kumwe mu ijonjora rya mbere muri Tanzania, iyi kipe ihagarariye u Rwanda ikarisoza idatsinzwe. Undi mukino uzahuza Ferroviao Maputo na GNBC kuri uyu wa Gatandatu.

Amakipe atatu ya mbere ni yo azabona itike yo gukomeza mu cyindi cyiciro cya BAL cy’umwaka usanzwe w’imikino uzatangira muri Werurwe 2020.

Imikino y'ijonjora rya kabiri rya Basketball Africa League yo mu gace k'ibirasirazuba iri kubera muri Kigali Arena
Kuri uyu wa Kane nibwo hamuritswe ikirango cy'iri rushanwa rishya
Ari kumwe n'abandi bayobozi batandukanye barimo abayobora Basketball na BAL, Perezida Kagame yamuritse ikirango cya Basketball Africa League (BAL)
GNBC yaje guhura na Patriots BBC yaratsinze imikino ibiri ibanza
GNBC yaje guhura na Patriots BBC yaratsinze imikino ibiri ibanza
Abakinnyi ba Patriots BBC mbere y'uko batangira umukino
Kigali Arena ni yo yakiriye imikino y'ijonjora rya kabiri ryo gushaka itike ya BAL mu gace k'uburasirazuba
Perezida Kagame yarebye uyu mukino wa Patriots BBC na GNBC
Ikirango cy'irushanwa rya Basketball Africa League
Perezida Kagame yavuze ko BAL ari inyongeragaciro ku mpano z’Abanyafurika
Kenneth Gasana atwara umupira abakinnyi ba GNBC
George Wilbert Blakeney wa Patriots BBC ashyira umupira mu nkangara mu buryo bwa dunk
Sagamba Sedar agerageza kubuza umukinnyi wa GNBC gutsinda
Patriots BBC yazamuye amanota mu gace ka nyuma
Ingabo z'igihugu na Polisi y'igihugu bari mu barebye uyu mukino
KeElly Randriamampionona yagoye abakinnyi ba Patriots BBC, atsinda amanota 26 muri uyu mukino
Gasana Kenny ashaka uko acenga Elly Randriamampionona
Kaje Elie aryamye hasi nyuma yo gukorwa mu maso
Kaje Elie yutegura gutanga umupira kuri Mugabe Aristide
Abakinnyi ba GNBC bahagurukaga ku ntebe mu minota ya nyuma bategereje ko ikipe yabo itsinda

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .