Ifoto y’Umunsi: Umubano wa Perezida Kagame na Masai Ujiri

Yanditswe na Eric Tony Ukurikiyimfura
Kuya 25 Ugushyingo 2019 saa 11:32
Yasuwe :
0 0

Umubano wa Perezida Paul Kagame n’Umuyobozi wa Toronto Raptors, Masai Ujiri, ni inkingi y’iterambere ry’umukino wa Basketball mu Rwanda ndetse no ku mugabane wa Afurika muri rusange.

Masai w’imyaka 49 uvuka muri Nigeria abinyujije mu mushinga we wa Giants of Africa (GOA) afasha abana bakiri bato bo ku mugabane wa Afurika gukura bakunda umukino wa Basketball.

Mu butumwa yashize ku rukuta rwa Twitter rwa Giants of Africa ejo hashize, Masai Ujiri, yavuze ko Perezida Kagame ari umuntu w’ingenzi ku mugabane wa Afurika.

Ati” Perezida w’u Rwanda Paul Kagame ni icyitegererezo mu iterambere ry’imikino n’andi mahirwe y’Afurika. Afurika igomba gutsinda. Afurika ni aka kanya.”

Ubwo yafunguraga Kigali Arena muri Kanama, Perezida Kagame yashimiye uyu mugabo kimwe n’abandi bagize uruhare mu bikorwa bigamije iterambere ry’umukino wa Basketball muri Afurika.

Ati “ Hari ab’ingenzi nshaka gushimira. Hari umugabo witwa Masai Ujiri, ni Perezida wa Toronto Raptors. Yazanye igitekerezo cyo kubaka uyu mukino w’amaboko wa Basketball, kuwukuza, kuwuteza imbere, muri Afurika afatanyije n’undi witwa Amadou Fall afatanyije na Komiseri wa NBA, Adam Silver, abo bagabo ndabashimira cyane, bafite Porogaramu yitwa Giants of Africa.”

Muri Nyakanga, Masai yashimye umuhate Perezida Kagame yagaragaje mu kwihutisha imirimo y’iyubakwa rya Kigali Arena, inzu y’imikino n’imyidagaduro yakira abantu 10 000.

Mu butumwa yanditse yifashishije urukuta rwa Instagram rwa Giants of Africa yagize ati “ Imvugo niyo ngiro. Nishimiye cyane Perezida Kagame ku iyubakwa rya Kigali Arena. Mu mwaka ushize yatubwiye ko agiye kubikora. Byarakozwe. Ni urugero rw’intagereranywa rw’aho Afurika ihagaze uyu munsi.’’

Muri Kamena, Perezida Paul Kagame yashimiye uyu Muyobozi wa Toronto Raptors, wayihesheje igikombe cya mbere cya Shampiyona ya NBA ari nacyo cya mbere yegukanye mu mateka yayo, nyuma yo gutsinda Golden State Warriors yari ifite icy’umwaka ushize.

Umushinga wa GOA wa Masai Ujiri, watangiye mu 2003 ukorera muri Nigeria gusa kugera mu 2014 ubwo uyu mugabo yafunguraga imipaka atangira kubikora no mu bindi bihugu bitandukanye bya Afurika birimo n’u Rwanda.

Kimwe mu bikorwa byashibutse muri uyu mushinga ni isanwa ry’ikibuga cy’umukino w’intoki wa Basketball cyo kuri Club Rafiki i Nyamirambo. Cyatashywe na Perezida Paul Kagame na Masai Ujiri ku wa 8 Kanama 2017.

Gusana iki kibuga ni isezerano ryatanzwe mu 2015 ubwo abatangije Giants of Africa bazaga mu Rwanda, bakagira umwanya wo kujya guhura n’abana bakinira Basketball kuri Club Rafiki. Hari kandi n’ingando z’abana zikorwa kuva mu 2015.

Mu guharanira iterambere ry’umukino wa Basketball muri Afurika, hari ibikorwa byinshi byamaze kwemezwa birimo na shampiyona ya ‘NBA’ muri Afurika izitwa ‘NBA Africa League’ igakinwa n’ibihugu bitandatu birimo u Rwanda.

Iri rushanwa rizitabirwa n’amakipe 12 aturutse ku mugabane wa Afurika, rizatangira muri Werurwe 2020, aho kuri ubu u Rwanda rwitegura kwakira ijonjora rya kabiri (mu itsinda H) ryo gushaka itike yo gukina iri rushanwa.

Masai Ujiri asanga Perezida Kagame ari icyitegererezo mu guteza imbere imikino muri Afurika
Ubwo mu 2017 Perezida Kagame na Ujiri bafunguraga ikibuga cyo kuri Club Rafiki
Perezida Kagame na Masai Ujiri mu nama ya Africa Investment Forum yabereye muri Afurika y'Epfo muri uku kwezi
Toronto Raptors iyoborwa na Masai Ujiri ni yo ifite igikombe cya NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza