Icyishatse Hervé yababajwe no gutwarwa igikombe na Patriots BBC ari mu makipe abiri atandukanye (Video)

Yanditswe na Eric Tony Ukurikiyimfura
Kuya 15 Ukwakira 2019 saa 02:12
Yasuwe :
0 0

Umukinnyi wa REG BBC, Icyishatse Hervé, avuga ko bimwe mu bihe bibi atazibagirwa amaze guhura nabyo mu mukino wa Basketball harimo kuba ikipe ya Patriots BBC imaze kumutwara igikombe cya Shampiyona inshuro ebyiri ari mu makipe abiri atandukanye.

Icyishatse w’imyaka 25 ni umukinnyi wa REG BBC guhera mu mwaka w’imikino wa 2017/18 yuma yo kuyigeramo avuye muri IPRC South BBC.

Mu kiganiro cyihariye yagiranye na IGIHE, Icyishatse yavuze ko bimwe mu bihe ananirwa kwakira kugeza ubu harimo kuba Patriots BBC imaze kumutwara igikombe cya Shampiyona inshuro ebyiri, ari mu makipe abiri atandukanye, IPRC South BBC na REG BBC.

Ati” Tuvuye ku minshi ishize aho twatakaje igikombe cya Shampiyona ari nacyo cyari icya Playoffs, umukino wambabaje ni umunsi Patriots BBC idusanga mu Majyepfo ikadutwara igikombe. Ni wo munsi wa mbere wambabaje. Ikindi ni igihe twakoze imyitozo mu Majyepfo, ariko ntitwajya muri Uganda mu mikino y’akarere ka gatanu.”

Icyishatse avuga ko we na bagenzi be bo muri REG BBC batumvaga uburyo amanota atatu yatsinze yagizwe abiri kandi byari kubaha amahirwe menshi yo gutsinda umukino wa nyuma watangiweho igikombe cya Shampiyona cyatwawe na Patriots BBC mu kwezi gushize.

Ati” Kugeza n’iyi saha ntabwo turabyumva, twari twakinnye ariko habamo udukosa tumwe na tumwe. Njye uko nabibonye ntabwo imisifurire yatubaniye, ntabwo babonye neza aho nari mpagaze, natsinze atatu. Kudukuraho inota mu gihe nka kiriya, byaduciye intege.”

Nubwo iminsi mibi yagize ari yo amakipe ye yatsinzwemo na Patriots BBC, na none ngo yagaruriwe icyizere n’umunsi IPRC South yakiniraga, yihimuraga kuri Patriots mu 2016, ikayitwara igikombe cya Playoffs iyitsindiye mu Mujyi wa Kigali.

Ati” Undi munsi wanshimishije na none ukangarurira icyizere ni umunsi twatwariye Playoffs i Kigali dutsinze Patriots, turi kumwe n’umutoza Mushumba Charles.”

Ku myaka 25, Icyishatse Hervé afite intego zo kuzakina hanze y’u Rwanda nyuma yo gufasha REG BBC kuza ku mwanya wa kabiri muri Shampiyona ya Basketball iterwa inkunga na Banki ya Kigali PLC.

Ati” Ndacyari muto ntabwo ndagera ku gihe cyo kuvuga ngo nakwicara. Ndacyakora kandi ndashaka ko Basketball yanjye itera imbere. Uretse no kurenga mu Rwanda, nkajya no hanze y’igihugu nkaba nakomeza umwuga wanjye wo gukina Basketball.”

Icyishatse yatangiye gukina Basketball yitoreza ku kibuga cya Kimisagara mbere yo kwerekeza muri ikipe ya 30 Plus yazamukiyemo MU 2014. Muri uwo mwaka, yerekeje mu ishuri rya RP-IPRC Huye, ayikinira imyaka itatu mbere yo kwerekeza muri REG BBC amazemo imyaka ibiri.

Icyishatse Hervé avuga ko yababajwe no gutwarwa igikombe ya Shampiyona ya Basketball inshuro ebyiri na Patriots BBC

Video: Mutesa Shaffy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza