Ni umuhango witabiriwe n’abakuru b’ibihugu n’aba za Guverinoma baturutse mu bice bitandukanye bya Afurika.

Aba-Sportif nabo ntabwo batanzwe muri ibi birori gusa kuri iyi nshuro tugiye kugaruka kuri APR BBC yaserutse mu buryo bwihariye.

Niba wari kuri Stade Amahoro cyangwa ahandi wakurikiraniye uyu muhango, birashoboka ko wabonye abantu bicaye hamwe bambaye amashati y’umweru. Abo ni Ikipe ya APR BBC.

Abagize iyi Kipe y’Ingabo bari bambaye amashati y’umweru y’amaboko magufi n’amaremare, uruhande rumwe ariho ikirango cyayo, ikindi kiriho uturongo tugaragaza ibendera ry’igihugu.

Iyi myambaro yakozwe n’inzu y’imideli ya ‘Revolution workshop’ isanzwe izwiho guhanga imyambaro ijyanye n’umuco n’amateka y’urwanda muburyo bugezweho.

Tamba Olivier wahanze iyi myambaro yabwiye IGIHE ko iyi myambaro yakozwe mu minsi ibiri gusa. Kuba umweru bisobanura u Rwanda, amabara y’ibendera n’ikirango cya APR bikagaragaza ko buri munyarwanda afite uruhare mu cyerekezo cy’igihugu.

Uyu musore kandi avuga ko yishimira kuba kera kabaye Abanyarwanda basigaye bakunda ibikorerwa mu Rwanda (Made in Rwanda) binagaragaza ko ubukangurambaga bwakozwe kuri byo buri gutanga umusaruro.

Ati “ Ibi bigaragaza ko ubukangurambaga bwa Made in Rwanda leta yakoze buri gutanga umusaruro. Ubu abantu bari kubyumva bishimiye ibikorerwa iwabo kandi batewe ishema nabyo.”

Asobanura kandi ko icyahindutse ari uburyo we na bagenzi be bongereye ikoranabuhanga mu byo bakora bigatuma imyenda ikorerwa mu Rwanda ntaho wayitandukanyiriza n’iyakozwe n’inzu zisanzwe zimenyerewe muguhanga imyambaro zikomeye ku isi”

Revolution workshop ikomeje kwerekana ubuhanga budasanzwe mu gukora imideli igezweho. Yaherukaga no gukora imikenyero iyo abahagarariye u Rwanda baserukanye mu birori byo gufungura ku mugaragaro Imikino Olempike yabereye i Paris mu Bufaransa.

Iyi nzu kandi, iri mu zakoze imyambaro yaserukanywe mu kwita izina no mu mikino ya Basketball Africa League.

Abarimo Axel Mpoyo na William Robynes ni uko baserutse

APR BBC yitabiriye ibirori by'irahira rya Perezida Kagame yambaye imyambaro yakozwe n'inzu y'imideli ya Revolution workshop

Axel Mpoyo na William Robynes bari bishimiye ibirori

Tamba washinze inzu y'imideli ya Revolution workshop yavuze ko uyu mwambaro usobanuye ubumwe n'icyerekezo cy'igihugu

Revolution workshop yanakoze imikenyero abanyarwanda baserukanye mu Mikino Olempike ya Paris