Ibyo wamenya ku makipe ya Afurika azakina Igikombe cy’Isi cya Basketball kizerekanwa kuri StarTimes

Yanditswe na Eric Tony Ukurikiyimfura
Kuya 28 Kanama 2019 saa 01:21
Yasuwe :
0 0

Guhera ku wa Gatandatu tariki ya 31 Kanama mu Bushinwa hazatangira igikombe cy’Isi cya Basketball kigiye kuba ku nshuro ya 18, aho kizitabirwa n’umubare munini w’amakipe yo muri Afurika kuruta ayari asanzwe yitabira iri rushanwa.

Angola, Tunisia, Côte d’Ivoire, Sénégal na Nigeria ni yo makipe azahagararira Umugane wa Afurika mu bihugu 32 bizakina iri rushanwa rizabera ku bibuga umunani byo mu Mijyi umunani itandukanye.

Ubwo iri rushanwa ryabaga bwa mbere mu 1950, Misiri ni cyo gihugu cya Afurika cyaryitabiriye, gisoreza ku mwanya wa gatanu mu makipe 11 mu gihe indi kipe ya Afurika yarisubiyemo mu 1974, ikaba Centrafrique.

Kuva icyo gihe, byibuze ikipe imwe ya Afurika yagiye igera muri 1/8 mu marushanwa yagiye aba.

Umunya-Mali Hamane Niang uyobora FIBA Africa, ariko byitezwe ko azatorerwa kuyobora Ishyirahamwe Mpuzamahanga ry’Umukino wa Basketball ku Isi (FIBA) ku wa Gatanu, yizeye ko uyu mwaka ibintu bishobora guhinduka, hakagira amakipe ya Afurika agera mu mikino ya nyuma.

Ati“ Hashize igihe kirekire amakipe ya Afurika yitabira Igikombe cy’Isi ariko ntagere kure. Icyo kwishimira ni uko amakipe ya Afurika yagaragaje urwego ari ho ugereranyije n’ayo babaga bahanganye, agakina nta gihunga.”

Igihugu cya Afurika kizitabira iri rushanwa gihabwa amahirwe menshi ni Nigeria izajya mu Bushinwa ifite abakinnyi benshi bakina muri Shampiyona ya Baskteball muri Amerika, NBA.

Nigeria iri mu itsinda B hamwe na Argentine, U Burusiya, Afurika y’Epfo na Korea y’Epfo.

Umukinnyi ukomeye izaba igenderaho ni Al-Farouq Aminu ufite uburebure bwa metero 2.06, aho mu kwezi gushize yerekeje muri Orlando Magic atanzweho miliyoni $29, avuye muri Portland Trail Blazers.

Nigeria ifite kandi andi mazina akomeye nka Ike Diogu w’imyaka 35 wakinnye muri NBA imyaka irindwi mbere yo kwerekeza muri Asia aho ubu akinira Shimane Susanoo Magic mu Buyapani, kimwe na Joshua Okogie wa Minnesota Timberwolves.

Okogie uzwiho gutsinda cyane, azaba ari kumwe n’umuhungu w’umutoza Alexander Nwora, Jordan Nwora ufite imyaka 20 ndetse ni we muto mu bo Nigeria izakinisha muri iri rushanwa.

Andi makipe ane, na yo afite ibyihariye ku bunararibonye bwabo, aho Sénégal itarahamagaye Tacko Fall wa Boston Celtics na Gorgui Dieng wa Minnesota Timberwolves basabye ko baha umwanya amakipe yabo, izaba ihanganye n’ibihugu birimo Australia, Canada na Lithuania mu itsinda H.

Tunisia ifite abarimo Salah Mejri uheruka kurekurwa na Dallas Mavericks, izaba ihanganye n’ibihugu birimo Espagne, Puerto Rica na Iran mu itsinda C.

Andi makipe abiri ya Afurika ni Angola na Côte d’Ivoire azaba ari mu itsinda D na A.

Izina rya mbere rikomeye muri Basketball rikomoka muri Afurika, Giannis Antetokounmpo ntabwo azakinira ikipe yo muri Afurika n’ubwo akomoka ku babyeyi b’Abanya-Nigeria kuko yavukiye mu Bugereki.

Uyu musore w’imyaka 24 ugeze mu mwaka wa kane w’amasezerano ya miliyoni $100 yasinye muri Milwaukee Bucks mu 2016, aheruka gukora amateka yo kuba umukinnyi wa mbere waje muri 20 ba mbere mu gutsinda amanota menshi, gutanga imipira myinshi ivamo amanota, gusama imipira iva ku nkangara no guhagarika imipira myinshi.

Antetokounmpo uvukana na Thanasis bazaba bari kumwe mu ikipe y’U Bugereki, aherutse gutorwa nk’Umukinnyi w’Umwaka muri NBA mu minsi ishize.

Abanyarwanda bazabasha gukurikira iri rushanwa ry’Igikombe cy’Isi cya Basketball kiri kuba ku masheni y’imikino ya StarTimes nka Sosiyete iyoboye mu gucuruza ibijyanye n’amashusho ya Televiziyo muri Afurika kandi ifite uburenganzira bwo kwerekana iri rushanwa.

Nigeria irahabwa amahirwe yo kugera kure kurusha andi makipe ahagarariye Afurika
Al-Farouq Aminu wa Nigeria ni umwe mu bakinnyi b'Abanyafurika bitezwe muri iri rushanwa
Umunya-Tunisia Salah Mejri uheruka gutandukana na Dallas Mavericks, yizeye ko iki Gikombe cy'Isi kizamufasha kubona indi kipe
Giannis Antetokounmpo uheruka gutorwa nka MVP muri NBA, akinira U Bugereki n'ubwo akomoka ku babyeyi b'Abanya-Nigeria
Imikino Côte d'Ivoire izakina mu Gikombe cy'Isi
Imikino Nigeria izakina mu Gikombe cy'Isi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza