Henry Mwinuka yagizwe umutoza wungirije mu ikipe y’Igihugu ya Basketball

Yanditswe na Eric Tony Ukurikiyimfura
Kuya 2 Nzeri 2020 saa 11:00
Yasuwe :
0 0

Umunya-Tanzania, Henry Mwinuka, usanzwe utoza REG BBC, yagizwe Umutoza wa Mbere wungirije mu Ikipe y’u Rwanda y’Umukino wa Basketball.

Henry Mwinuka yasimbuye Mwiseneza Maxime Marius wahawe inshingano zo kuba Umuyobozi ushinzwe ikorwa ry’Imihanda mu turere mu mwaka ushize, ariko akaba abifatanya no kuba Umutoza wungirije muri REG BBC.

Mwinuka azungiriza Umunya-Serbia Vladmir Bosjnak muri iki gihe Ikipe y’Igihugu igiye kwitegura imikino yo gushaka itike y’Igikombe cya Afurika cy’abagabo (Afrobasket) kizabera mu Rwanda mu 2021 kuva tariki ya 24 Kanama kugeza ku wa 5 Nzeri.

Ishyirahamwe ry’Umukino wa Basketball mu Rwanda (FERWABA) ryemeje ko Nkusi A. Karim afata inshingano z’Umutoza wa Kabiri wungirije mu Ikipe y’Igihugu.

Mu gushaka itike ya Afrobasket 2021, u Rwanda ruri mu itsinda D hamwe na Nigeria, Mali na Algeria, aho iyi mikino yo gushaka itike izabera i Kigali mu Ugushyingo uyu mwaka.

Basketball iri mu mikino itaremererwa gusubukurwa nyuma yo guhagarikwa n’icyorezo cya Coronavirus muri Werurwe uyu mwaka.

Henry Mwinuka yageze mu Rwanda muri 2015, agirwa umutoza wa Patriots BBC asimbuye Kalima Cyrille wari umaze kwegura.

Mu myaka ine yayitoje kugeza mu Ugushyingo 2019, Mwinuka yahesheje Patriots BBC ibikombe bitatu bya Shampiyona, irushanwa ryo kwibuka n’irushanwa ry’Intwari. Yayihesheje kandi igikombe gitegura Shampiyona na bibiri cya Play-offs.

Mu 2019, Mwinuka yafashije Patriots BBC gutwara Shampiyona ku nshuro ya gatatu ndetse ayigeza mu ijonjora rya kabiri ryo gushaka tike y’imikino ya Basketball Africa League (BAL 2020), aho yatsinze imikino ine yakiniye muri Tanzania.

Mu Ugushying 2020, nibwo Henry Mwinuka yagizwe umutoza mukuru wa REG BBC.

Mbere yo kuza mu Rwanda, yabaye umutoza wa University of Dar es Salaam Basketball Club hagati ya 2003 na 2006 na Savio Basketball Club hagati ya 2007 na 2008.

Yabaye kandi umutoza wungirije mu ikipe y’igihugu ya Tanzania hagati ya 2009 na 2010 ndetse n’Umutoza wa Kampala International University hagati ya 2011 na 2015.

Umunya-Tanzania Henry Mwinuka yagizwe Umutoza wa Mbere wungirije w'Ikipe y'Igihugu ya Basketball
Mwiseneza Maxime Marius ni we wari usanzwe yungirije umutoza mukuru Vladmir Bosjnak
Henry Mwinuka na Mwiseneza Maxime Marius bakorana muri REG BBC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .