Uburyo butatu buzavamo ubuzakoreshwa mu gukina BAL 2020 izasorezwa i Kigali

Yanditswe na Eric Tony Ukurikiyimfura
Kuya 27 Gicurasi 2020 saa 10:52
Yasuwe :
0 0

Umuyobozi w’Ishyirahamwe ry’Umukino wa Basketball muri Afurika, Anibal Manave, yatangaje ko bari gutekereza uburyo butatu irushanwa rya Basketball Africa League (BAL 2020) rizahuza amakipe akomeye muri Afurika, rishobora kuzakinwamo.

BAL 2020 yagombaga kuba hagati ya Werurwe na Gicurasi mu bihugu bitandatu bya Afurika, igasorezwa i Kigali, ariko iri rushanwa ryasubitswe kubera icyorezo cya Coronavirus cyibasiye Isi.

Perezida w’Ishyirahamwe ry’Umukino wa Basketball muri Afurika, Anibal Manave, yabwiye urubuga rwa interineti rwa FIBA ko bafite icyizere ko iri rushanwa rizakinwa uyu mwaka, nk’uko byari biteganyijwe.

Ati “Nk’urwego rubishinzwe, turi guhura n’ibihe bitoroshye. Ntawamenya uko ejo hameze kandi tugendera ku mabwiriza y’Ishami ry’Umuryango w’Abibumbye ryita ku Buzima (WHO) n’inzego z’ubuzima. Ariko icyiza ni uko bimwe mu bihugu bya Afurika byatangiye kugabanya ingamba zikomeye zari zafashwe mu kwirinda Coronavirus, ibyo bitanga icyizere ko BAL yabaho uyu mwaka.”

“Icyo tugomba gukora ni ukwiga umushinga wo gusubukura BAL mu mezi ari imbere, byibuze muri Nzeri. Bamwe bavuga ko COVID-19 izaba iri hejuru cyane muri Afurika muri Nzeri, ariko nta bimenyetso bafite, amakuru meza ni uko ibihugu byinshi bikomeje kurwanya iki cyorezo.”

Anibal Manave yavuze ko mu gihe uburyo irushanwa ryagombaga gukinwamo bwakwangizwa n’igihe gito cyaba gisigaye ngo umwaka urangire, hari ubundi buryo butatu bari gutekerezaho.

Ati “Dufite uburyo butatu bushoboka: Ubwa mbere, ni ukugumana uburyo bwari busanzwe (gukina umwaka usanzwe w’imikino mu bihugu bitandatu noneho icyiciro gisoza kikabera mu Rwanda). “

“Ubwa kabiri: Kuba BAL yakinirwa mu bihugu bibiri, hakabaho Nile Conference yakinira mu gihugu kimwe na Sahara Conference yakinira mu kindi. Amakipe ane ya mbere muri buri tsinda agakinira icyiciro cya nyuma mu Rwanda. Ubwa gatatu: BAL y’uyu mwaka yakinirwa mu gihugu kimwe mu gihe cy’ibyumweru bibiri, harimo n’icyiciro cya nyuma. Turi kubikoraho ngo urebe uburyo bwiza dukurikije uko ibihe bimeze.”

Amakipe 12 yabonye itike yo gukina irushanwa rya Basketball Africa League (BAL) rigiye kuba bwa mbere ni Patriots (Rwanda), GNBC (Madagascar), Ferroviario de Maputo (Mozambique), AS Douanes (Sénégal), AS Police (Mali), AS Sale (Maroc), GS Petroliers (Algérie), FAP (Cameroun), Petro de Luanda (Angola), Rivers Hoopers (Nigeria), Union Monastir (Tunisia) na Zamalek (Misiri).

Ikirango cya BAL cyamurikiwe i Kigali na Perezida Kagame mu Ukuboza 2019
Patriots BBC yo mu Rwanda iri mu makipe 12 azakina iri rushanwa biteganyijwe ko rizasorezwa i Kigali ku nshuro yaryo ya mbere rikinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .