Gushyiraho icyiciro cya kabiri, amarushanwa ya za Kaminuza n’ay’abana muri gahunda nshya za FERWABA

Yanditswe na Eric Tony Ukurikiyimfura
Kuya 31 Mutarama 2020 saa 01:03
Yasuwe :
0 0

Ubuyobozi bw’Ishyirahamwe Nyarwanda ry’Umukino wa Basketball (FERWABA) bwemeje ko guhera mu mwaka utaha w’imikino wa 2020/21 hashobora gutangira Shampiyona y’icyiciro cya kabiri muri uyu mukino ndetse hakanashyirwaho amarushanwa azahuza Kaminuza zo mu Rwanda.

Ibi ni bimwe mu byagarutsweho mu kiganiro FERWABA yagiranye n’itangazamakuru kuri uyu wa Kane, cyagarutse ku bikorwa by’iri Shyirahamwe ry’Umukino wa Basketball muri uyu mwaka w’imikino wa 2019/20.

Iki kiganiro cyari kiyobowe na Mugwiza Désiré uyobora FERWABA, ari kumwe na Visi Perezida wa kabiri ushinzwe amarushanwa, Nyirishema Richard, cyagarutse kandi no ku marushanwa atandukanye yabaye n’ateganyijwe muri uyu mwaka w’imikino yaba ay’imbere mu gihugu ndetse n’ari mpuzamahanga, azagaragaramo amakipe yo mu Rwanda.

Perezida wa FERWABA, Mugwiza Désiré, yavuze ko kuri ubu bari kwiga uburyo hashyirwaho Shampiyona y’icyiciro cya kabiri nyuma y’uko umubare w’amakipe akina Basketball mu Rwanda umaze kwiyongera.

Ati “Turebye uburyo Basketball yacu yari imeze mu minsi ishize n’uko kuri ubu ihagaze ubona ko imaze kuzamuka ndetse n’amakipe amaze kwiyongera. Turi gutekereza uburyo hashyirwaho n’icyiciro cya kabiri ndetse turizera ko n’amakipe aziyongera kuko mu cyiciro cya kabiri ntabwo tubasaba ibintu byinshi.”

Mu Ugushyingo 2019, FERWABA yakiriye amakipe arindwi mashya arimo atanu y’abagabo, aya yiyongeraga ku yandi 15, arimo icyenda y’abagabo, yakinaga muri Shampiyona ya Basketball mu bagabo n’abagore.

Umuyobozi wa FERWABA, yavuze ko umwanzuro kuri uyu mushinga wo gushyiraho icyiciro cya kabiri uzemezwa n’Inteko Rusange y’abanyamuryango b’iri Shyirahamwe ku buryo nta gihindutse byakorwa mu mwaka utaha w’imikino wa 2020/21.

Visi Perezida wa kabiri ushinzwe amarushanwa muri FERWABA, Nyirishema Richard, yavuze ko kandi muri uyu mwaka hashobora gutangira amarushanwa ahuza za Kaminuza mu rwego rwo gufasha kuzamura uyu mukino no kuwukundisha Abanyarwanda.

FERWABA iteganya ko kandi irushanwa rya Basketball y’abana bakina ari batatu rizashyirwamo imbaraga rikagera mu duce dutandatu tw’igihugu, aho kuba tune nk’uko byagenze mu mwaka ushize, ndetse kuri iyi nshuro rikazakinwa no mu bakuru ku buryo Abanyarwanda bashobora no kwitabira amarushanwa yaryo ku rwego mpuzamahanga.

Iri Shyirahamwe riteganya amahugurwa y’abatoza azakorwa ku bufatanye na FIBA ndetse n’amarushanwa y’abana batarengeje imyaka 15 aterwa inkunga na NBA (Jr NBA League) azaba hagati ya Werurwe na Nzeri 2020.

FERWABA yatangaje ko amarushanwa ya Basketball y’abakina ari batatu ihuza abana bari munsi y’imyaka 17, agaterwa inkunga na Banki ya Kigali PLC, na yo azaba hagati ya Werurwe na Nzeri 2020 mu gihe Umwiherero wa Giants of Africa na Basketball Without Borders izaba muri Kanama 2020.

Hazabaho kandi amarushanwa ya Mini-Basketball azahuza abana 400 bari hagati y’imyaka itanu na 12 muri Nyakanga na Kanama mu gihe mu Ugushyingo n’Ukuboza 2020 hazabaho umwiherero wo mu biruhuko.

Uyu mwaka hazongera gukinwa umukino wa “BK All-Star”

Mu Ugushyingo 2019 nibwo mu Rwanda hongeye gukinwa umukino wa “BK All Star” uhuza intyoza muri Basketball.

Uyu mukino wabaye bwa mbere nyuma y’imyaka itandatu, aho byaherukaga mu Rwanda mu 2013.

FERWABA ivuga ko n’uyu mwaka hateguwe umukino nk’uyu ndetse uzakinwa tariki ya 6 Ugushyingo 2020.

Ishyirahamwe ry’Umukino wa Basketball rivuga ko kandi hazakinwa amarushanwa arimo iry’Umunsi w’abagore rizaba muri Werurwe, iryo Kwibuka ku nshuro ya 26 Jenoside yakorewe Abatutsi, rizaba muri Kamena, Legacy Tournament izakinwa mu Ukwakira n’irushanwa ry’Agaciro rizaba mu Ugushyingo 2020.

Imikino ya BAL izasorezwa i Kigali muri Gicurasi

FERWABA yavuze ko irushanwa rya Basketball Africa League rigiye gukinwa bwa mbere, rizasorezwa i Kigali muri Gicurasi uyu mwaka, aho amakipe ane azaba yageze mu cyiciro cya nyuma, ariyo azakinira muri Kigali Arena.

Patriots BBC ihagarariye u Rwanda muri iri rushanwa, izakina icyiciro kizitabirwa n’amakipe 12 hagati ya Werurwe na Mata uyu mwaka.

Mugwiza Désiré uyobora FERWABA mu kiganiro n'abanyamakuru kuri uyu wa Kane
Visi Perezida wa kabiri ushinzwe amarushanwa muri Ferwaba Nyirishema Richard agaruka ku marushanwa yose ateganyijwe uyu mwaka
FERWABA igiye gutangiza Shampiyona y'Icyiciro cya Kabiri n'amarushanwa ahuza za Kaminuza

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .