00:00:00 IGIHE NETWORK KN KINYARWANDA EN ENGLISH FR FRANCAIS

Gashyantare ishobora gusiga LeBron James yanditse amateka bigoye gukuraho muri NBA

Yanditswe na Iradukunda Olivier
Kuya 17 Mutarama 2023 saa 11:34
Yasuwe :

LeBron James amaze kwirenza ibinyacumi bibiri by’imyaka akina muri Shampiyona ya Basketball ikomeye muri Leta Zunze Ubumwe za Amerika. Mu gihe yakomezanya imbaraga afite, Gashyantare yamusiga ari we mukinnyi ufite amanota menshi kurusha undi wese wayikinnyemo.

Aka gahigo ashobora guca, kugeza ubu gafitwe na Kareem Abdul Jabbar watsinze amanota 38,387 mu gihe yamaze akina muri iyi Shampiyona. Ku Cyumweru, tariki ya 15 Mutarama, ubwo LeBron James yuzuzaga amanota ibihumbi 38, yagaragaje ko aka gahigo azagaca.

Mu mukino Los Angeles Lakers yatsinzwemo na Philadelphia 76ers amanota 112-113, uyu mugabo yatsinzemo amano 35 wenyine akomeza kugaragaza ko uyu mukino awufite mu biganza bye.

Akimara gutsinda ayo manota byahise bisobanuka neza ko abura amanota 364 kugira ngo ahindure amateka y’umukinnyi watsinze amanota menshi muri NBA. Ukurikije imibare, ashobora kuyahindura hagati ya tariki 5 na 12 Gashyantare 2023.

Uyu mugabo w’imyaka 38, mu gihe yakongera impuzandengo y’amanota atsinda ku mukino, ikava kuri 27 ikajya kuri 29, cyangwa ntagire ibibazo by’imvune, yakwigaranzura mugenzi we atagejeje tariki ya 12 Gashyantare.

Tariki ya 5 Gashyantare, azaba afitanye umukino na New Orleans Pelicans, tariki 8 Gashyantare bakine na Oklahoma City Thunder. Mu gihe byaba bitamukundiye, yakwinjiza amanota menshi kuri ilwaukee Bucks bazakina tariki 10, byose byananirana, akayakuramo ku mukino wa Golden State Warriors bazakina tariki ya 12.

Umukinnyi ukomeye muri Golden State Warriors, Draymond Green, yavuze imyato mugenzi we, LeBron James, ko abibona ko amateka azayahindura akaba umukinnyi wa mbere ku Isi.

Ati “Ndacyabivuga, ndi mu ruhande rwa LeBron. Ku myaka 20 amaze mu irushanwa, akaba akina ku rwego rwo hejuru biratangaje. Birumvikana ku myaka 20, 26 cyangwa 30 ntabwo byaba ari bimwe, ariko uburyo akina bigaragaza ikindi kintu gikomeye.”

Yakomeje agira ati “Gukina Basketball kuri iki gihe biragoye, ariko ibyo LeBron ari gukora mu kibuga no hanze yacyo, bituma njye mukurira ingofero. Ntabwo nzi ko kubona udi muntu nka we byapfa koroha muri NBA.”

Aganira na ESPN, nyir’ubwite atangaza ibyo ari gukora mu nzira yo kwandika amateka, LeBron yavuze ko icyo yitaho atari ugutsinda, ahubwo kurwanira ishyaka bagenzi be ari cyo ashyira imbere.

Ati “Gukuraho agahigo ntabwo nigeze mbitekerezaho kuko no mu mpano yanjye ntabwo ari byo mbona biza imbere, ahubwo niyiziho ko nzi gutanga imipira myiza kandi vuba cyane. Nahoze nkunda gufasha bagenzi banjye mu kibuga.”

Yakomeje agira ati “Iyo mvuze ngo ntambo ndi umukinnyi utsinda, mubyumve nk’ukuri kuko no mu byo mba ndikubara ntabwo gutsinda binyihutira cyane. Yego koko bigarukwaho, kuba ndi guhangana n’igihangange Kareem, ariko kubisobanura sinabishobora kuko nta gaciro mbiha cyane.”

Kuba ari umunyamateka muri uyu mukino mu birebana no gutsinda amanota byinshi, ubushobozi bwe mu gufasha bagenzi be gukina ntibushidikanywaho. LeBron ni we wenyine watsinze aya manota [agera ku bihumbi 38], yaratanze imipira ivamo amanota irenga ibihumbi 10 na ‘rebounds’ zirenga ibihumbi 10.

Nta wundi mukinnyi urakora ibi muri uyu mukino, usibye Oscar Robertson wabashije kubigerageza ariko na we ntiyabishobora. Oscar yatsinze amanota ibihumbi 26, atanga imipira ibihumbi birindwi ndetse na ‘rebounds’ ibihumbi icyenda.

Ukwezi kwa Gashyantare gushobora gusiga LeBon James yanditse amateka bigoye gukuraho muri NBA
Kugira ngo LeBron James agere kuri aya mateka, birasaba ko atsinda amanota 27 kuri buri mukino
LeBron James yabaye umukinnyi wa kabiri urengeje amanota ibihumbi 38 muri NBA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .