Ferwaba yemeje ko shampiyona ya Basketball izasubukurwa muri Nzeri

Yanditswe na IGIHE
Kuya 17 Gicurasi 2020 saa 05:57
Yasuwe :
0 0

Ishyirahamwe ry’Umukino wa Basketball mu Rwanda (Ferwaba) ryemeje ko Shampiyona yitiriwe BK Basketball National League 2019-2020 mu bagabo no mu bagore izasubukurwa muri Nzeri 2020.

Iki cyemezo cyafatiwe mu nama yabaye kuri iki Cyumweru yahuje Komite Nyobozi ya FERWABA n’abayobozi b’amakipe yitabiriye shampiyona 2019/20 hagamijwe kumvikana ku isubukurwa ry’amarushanwa yari ateganyijwe muri uyu mwaka w’imikino.

Iyi nama yakozwe mu buryo bw’ikoranabuhanga bijyanye n’amabwiriza ya Leta yo kurwanya ikwirakwira rya Coronavirus. Yitabiriwe n’abayobozi b’amakipe 15 kuri 20 (abagabo n’abagore) yitabiriye shampiyona.

Mu myanzuro yafatiwe muri iyi nama harimo ko Shampiyona igomba gusubukurwa muri Nzeri uyu mwaka mu gihe amarushanwa yari yateguwe mu cyiciro cy’abakuru yakuweho.

Ferwaba yatangaje ko iyi myanzuro yashyizweho umukono kuri uyu wa 17 Gicurasi 2020, ishobora guhinduka bitewe n’amabwiriza ya Leta. Kuri ubu ibikorwa byose bihuza abantu benshi birimo ibitaramo n’imikino byarahagaritswe mu kwirinda ikwirakwira ry’icyorezo cya COVID-19.

Imyanzuro yafatiwe mu nama yashingiye ku bihe bidasanzwe igihugu kirimo kubera COVID-19, hagendewe no ku mabwiriza Leta y’u Rwanda yatanze n’aya Minisiteri ya Siporo agenga isubukurwa ry’imikino yo ku wa 7 Gicurasi 2020.

-  Ibyo Komite Nyobozi ya FERWABA n’abayobozi b’amakipe bemeranyijeho:

1. Shampiyona yitiriwe BK Basketball National League 2019-2020 mu bagabo no mu bagore izasubukurwa guhera mu kwezi kwa Nzeri 2020. Imikino yose ibanza n’iyo kwishyura yari isigaye gukinwa izakinwa, buri kipe ikazajya ikina imikino ibiri cyangwa itatu mu cyumweru aho bishoboka.

2. Andi marushanwa yari yarateganijwe na FERWABA mu cyiciro cy’abakuru muri uyu mwaka avuyeho.

3. Imikino ya Playoffs izahuza amakipe ane ya mbere izakinwa bitandukanye n’ibyari bisanzwe biteganyijwe n’amategeko agenga Playoffs.

  • Imikino ya Kimwe cya kabiri izakinwa hatanguranwa imikino ibiri (Best of 3)
  • Imikino ya Nyuma (Finals) izakinwa hatanguranwa imikino itatu (best of 5)

4. Umwaka w’imikino wa 2019/20 uzasozwa haba “All Stars Game”.

5. Amakipe atazashobora gukomeza shampiyona y’uyu mwaka kubera impamvu zitandukanye muri ibi bihe bidasanzwe, akabisaba mu nyandiko, ntazahabwa ibihano bisanzwe biteganyijwe n’amategeko ku makipe yikuye mu marushanwa.

6. Iyi myanzuro ishobora guhinduka bitewe n’amabwiriza mashya yatangwa na Leta y’u Rwanda.

Shampiyona ya Basketball mu Rwanda izasubukurwa muri Nzeri 2020
Komite Nyobozi y'Ishyirahamwe ry’Umukino wa Basketball mu Rwanda n’abayobozi b’amakipe yitabiriye shampiyona 2019/20 bumvikanye ku isubukurwa ry’amarushanwa yari ateganyijwe mu mwaka w’imikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .