FERWABA yatangije uburyo bwo kugura amatike yo kwinjira ku bibuga hakoreshejwe ikoranabuhanga

Yanditswe na Eric Tony Ukurikiyimfura
Kuya 14 Kanama 2020 saa 09:00
Yasuwe :
0 0

Ishyirahamwe Nyarwanda ry’Umukino wa Basketball (FERWABA) ryasinyanye amasezerano y’imyaka itanu na Sosiyete ya PGM izajya irifasha mu bijyanye no kugura amatike yo kwinjira ku bibuga hakoreshejwe ikoranabuhanga.

Uyu muhango wabereye muri Kigali Arena kuri uyu wa Gatanu, witabiriwe n’inzego zitandukanye zirimo Minisiteri ya Siporo yari ihagarariwe n’Umunyamabanga wayo uhoraho, Shema Maboko Didier, abakora ibijyanye n’itumanaho n’abafite aho bahurira n’imikino mu Rwanda.

Nyuma yo gusinya aya masezerano y’imyaka itanu ishobora kongerwa, Perezida wa FERWABA, Mugwiza Désiré, yavuze ko ubu buryo bushya buzafasha abantu kurushaho gukurikirana no kwitabira umukino wa Basketball mu mutuzo bitabaye ngombwa gutonda umurongo.

Yagize ati “Ni amasezerano azafasha iterambere rya Basketball kuko agamije guha serivisi nziza abakunda uyu mukino mu gihe baje kuwureba ku bibuga, aho bazajya bagura amatike bari mu ngo zabo cyangwa mu kazi, bakirinda gutonda imirongo.”

“Ni gahunda igamije gushyira mu bikorwa politiki y’igihugu cyacu yo kutagendana amafaranga ahubwo hagakoreshwa ikoranabuhanga dore ko kuyahererekanya bishobora gutera indwara cyangwa akaba yakwibwa.”

Mugwiza yakomeje avuga ko uretse kugura amatike yo ku bibuga, Sosiyete ya PMG izagira uruhare mu kwamamaza ibikorwa bya FERWABA birimo no kuyikorera urubuga rwa internet ruzajya rusangwaho amakuru ajyanye n’uyu mukino.

Ati “Turizera ko abakunzi ba Basketball bagiye kubona izindi serivisi nshyashya ziyongera ku zari zisanzwe kuko bizadufasha kwagura ibikorwa byacu.”

Jacques Kagabo uyobora Sosiyete ya PMG yashimiye FERWABA yemeye gukora nabo muri iyi serivisi nshya izafasha Abanyarwanda kugura amatike.

Ati “Ndashimira by’umwihariko ubuyobozi bwa FERWABA ku ruhare bwagize ngo iyi serivisi igerwaho kandi igende neza. Twari tumaze igihe kigera hafi ku mwaka dukora ibyabanjirije ibyo mwabonye hano.”

Yakomeje avuga ko amatike azajya agurwa binyuze ku rubuga rwa pmg.rw ruba kuri internet mu gihe abakoresha telefoni zisanzwe mu buryo bwa USSD, bazajya bakoresha *730#.

Ubu buryo bwo kugura itike hakoreshejwe ikoranabuhanga, buzafasha umuntu kugura umwanya yicaramo muri Kigali Arena, ahisemo nimero yifuza. Buzajya kandi bukoreshwa no ku bindi bibuga byakira imikino yishyuzwa birimo Petit Stade.

PMG ni Sosiyete Nyarwanda ikora ibijyanye no kwishyura hifashishijwe ikoranabuhanga, uburyo bwo kugura amatike bukaba imwe muri serivisi itanga.

Uretse FERWABA, PMG ikorana n’amakipe ya APR FC na Patriots BBC aho abakunzi bayo bayatera inkunga bifashishije serivisi zayo.

Perezida wa FERWABA, Mugwiza Désiré (iburyo) na Jacques Kagabo uyobora Sosiyete ya PMG (ibumoso) bashyira umukono ku masezerano y'ubufatanye bw'impande zombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .