FERWABA ishobora guhindura uburyo Shampiyona yakinwagamo

Yanditswe na Eric Tony Ukurikiyimfura
Kuya 18 Kanama 2020 saa 12:22
Yasuwe :
0 0

Ishyirahamwe Nyarwanda ry’Umukino wa Baskteball (FERWABA) rirateganya ko hashobora kuba impinduka mu buryo Shampiyona yakinwagamo nyuma y’uko isubitswe kubera icyorezo cya Coronavirus.

Ibikorwa byose by’imikino mu Rwanda, byahagaritswe muri Werurwe uyu mwaka nyuma y’uko Minisiteri y’Ubuzima itangaje ko habonetse umurwayi wa mbere wa Coronavirus mu gihugu.

Muri Gicurasi, FERWABA yemeje ko Shampiyona yitiriwe BK Basketball National League 2019/20 mu bagabo no mu bagore izasubukurwa muri Nzeri 2020.

Visi Perezida wa kabiri wa FERWABA ushinzwe amarushanwa, Nyirishema Richard, avuga ko bitewe n’igihe imikino ishobora gusubukurirwa, hari gutekerezwa impinduka mu buryo Shampiyona yakinwagamo.

Ati “Itangira rya Shampiyona byari uko muri Kanama dusubukura imyitozo noneho muri Nzeri tugasubukura Shamiyona tugendeye ku mabwiriza ya Minisiteri ya Siporo twari dufite. Nibyo twari twumvikanye n’abayobozi b’amakipe.”

“Kugeza ubu kuba tutarabona uburenganzira bwo gutangira gukora imyitozo, dufite uburyo turi gutekereza, aho tuzongera kwicarana n’abo twafatanye imyanzuro tukareba icyo twakora. Twareba niba Shampiyona izakomeza uko yari imeze cyangwa niba tuyigira ngufi, tugashyiraho ubundi buryo. Bizaterwa n’igihe tuzaba twemerewe gusubukura imyitozo kuko bisaba igihe cyo kwitegura.”

Ubwo Shampiyona ya Basketball yahagarikwaga muri Werurwe hari hamaze gukinwa iminsi 21 gusa.

Ishobora gusubukurwa ikinwa mu buryo nk’ubwo NBA iri gukinwamo, aho imikino y’umwaka usanzwe yagabanyijwe kugira ngo byihutishe iri rushanwa rigeze muri Play-offs.

Shampiyona ya Basketball mu Rwanda yasubitswe muri Werurwe kubera icyorezo cya Coronavirus
Visi Perezida wa kabiri ushinzwe amarushanwa muri Ferwaba, Nyirishema Richard, avuga ko bazicarana n'amakipe bakemeza uburyo Shampiyona izasozwamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .