Hakizimana Lionel yahishuye uko yatangiye akina ruhago, ubu akaba afite izina rikomeye muri Basketball

Yanditswe na Eric Tony Ukurikiyimfura
Kuya 1 Ukwakira 2019 saa 08:10
Yasuwe :
0 0

Hakizimana Lionel ni umwe mu bakinnyi bafite izina rikomeye mu mukino wa Basketball hano mu Rwanda, aho akinira ikipe ya Patriots BBC n’ikipe y’igihugu y’u Rwanda. Uyu mukinnyi yatangiye akina umupira w’amaguru ariko avuga ko kuri we Basketball imaze kumugeza kuri byinshi haba mu kibuga no mu buzima busanzwe.

Mu kiganiro yagiranye na IGIHE, Hakizimana Lionel yavuze ko kuba yaratangiye gukina umukino wa Basketball akiri muto, bikamufasha kubona ishuri ryiza, byamuhaye imbaraga nyinshi zo gukunda uyu mukino no gukora cyane.

Ati “Twaje mu Rwanda mu 1998 [avuye i Burundi aho yavukiye]. Icyo gihe nakinaga umupira w’amaguru n’abandi bana. Ariko nza kuva mu mupira w’amaguru njya muri Basketball kuko nari maze kuvunikira ukuboko muri ruhago. Nari mfite marume wakinaga Basketball wabaga muri Angola, arambwira ngo niba nshaka ko kuzakira, nzagukoreshe cyane, angurira umupira wa Basketball nkajya njya gukina.”

“Natangiriye ku kigo cy’i Nyanza bita Collège Saint-Emmanuel, nahize umwaka umwe mpita mbona umwanya mu kigo cy’abapadiri cya Christ-Roi kubera gukina, nibwo nakomeje gukina Basketball, ntangira no kubishyiramo imbaraga kuko nari mbonye ishuri mu kigo cyiza cy’abapadiri, ndavuga ngo ngomba kubikomeza.”

Hakizimana avuga ko Basketball yamufashije kwiga neza amasomo ye, yaba mu yisumbuye ndetse na kaminuza, aho yarangije muri Kaminuza yigenga ya Kigali (ULK) ndetse n’ubu akomeje kwiga icyiciro cya gatatu cya kaminuza [Masters] muri Kaminuza y’u Rwanda, abifashijwemo cyane n’uyu umukino, aho anakorera Banki ya Kigali PLC.

Ati “Navuga ko natangiye neza neza ndi mu mwaka wa kabiri kuko ngeze mu mwaka wa gatatu nibwo nakiniye ikipe y’igihugu y’abana batarengeje imyaka 18 ndetse ninjye wa mbere wakiniye ikipe y’ikigo niga mu cyiciro rusange [tronc commun]. Icyo gihe nibwo navuze nti hano hashobora kuba hari impano.”

Uyu musore yatangiriye gukina Basketball mu ikipe ya Espoir BBC yakoreraga imyitozo hafi yaho bari batuye (Club Rafiki i Nyamirambo), ariko bitewe n’uko yari ifite abakinnyi benshi bakomeye ndetse banamurusha ubunararibonye, ahitamo kwerekeza mu ikipe ya Cercle Sportifs de Kigali yakiniye imyaka ibiri, ahava ajya muri APR BBC yakiniye umwaka umwe mbere yo kongera gusubira muri Espoir BBC.

Ati “Mu 2010 nibwo natangiye muri Cercle mpakina imyaka itatu, ariko bitewe n’uko bitagendaga neza mbona amasezerano y’imyaka ibiri, njya gukina muri APR BBC na yo nyikinira imyaka ibiri, Espoir BBC yifuza ko ngaruka mu rugo.”

“Navuga ko nahise ngira ibihe byiza mu ikipe natangiriyemo, navuga ko byari ishema kuri njyewe, kuba ikipe natangiriyemo nari nongeye kuyigarukamo, ariko n’ubu ndacyagira ibihe byiza muri Patriots nagezemo mu 2016, navuga ko ibihe byiza bigikomeza.”

Agaruka ku mugore we Lauren Richardson basezeranye mu mpera za 2017 nyuma y’imyaka itanu bakundana, Hakizimana Lionel yavuze ko yabonye ari umukobwa mwiza utandukanye n’abandi banyamahanga, wifuza kubaho nk’umunyarwandakazi.

Ati “Ni umukobwa w’ikinyabupfura, ni umukobwa warezwe neza kandi ni umukobwa ukunda Imana. Imico ye ntabwo imeze nk’iy’abanyamerika nk’uko tuba tubizi cyangwa iy’abanyamahanga nubwo ari ho aturuka, ariko muri we yumva ashaka kuba nk’umunyarwandakazi kandi niko ameze.”

Hakizimana Lionel yamenyekanye cyane mu 2010 mu irushanwa ry’igikombe cya Afurika cy’Abatarengeje imyaka 18 muri Basketball ubwo yabaga umukinnyi watsinze amanota menshi kurusha abandi.

Uyu mukinnyi ashimira cyane umutoza Hashim wazamuye abakinnyi benshi hano mu Rwanda, aho asanga ari we wamufashije cyane kugira ngo agire izina afite ubu mu mukino wa Basketball.

Hakizimana Lionel yukiye i Burundi, tariki ya 18 Ukuboza 1987, mu muryango w’abana batatu; mushiki we mukuru Hakizimana Bella akurikira, mu gihe murumuna we Hakizimana Alain yaje kwitaba Imana akiri muto. Lionel na mushiki we basigaranye, bageze mu Rwanda mu 1998.

Hakizimana Lionel amaze gutwarana na Patriots BBC ibikombe bitatu bya shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza