Ivi ryaterewe muri Kigali Arena ryasembuye ibyiyumviro by’abakoresha imbuga nkoranyambaga

Yanditswe na Eric Tony Ukurikiyimfura
Kuya 4 Ugushyingo 2019 saa 03:27
Yasuwe :
0 0

Urukundo ruruta byose! Abarurimo by’ukuri rimwe na rimwe ntibihishira ndetse bamwe birangira babigaragaje inshuti, abavandimwe n’abandi mu ruhame.

Rukundo Fabrice ukinira Espoir BBC na we ntiyarwihereranye! Ku wa 1 Ugushyingo 2019, yateye ivi imbere y’abasaga ibihumbi 10 bari muri Kigali Arena asaba umukunzi we kuzamubera umugore, anamwambika impeta ibishimangira.

Iyi nkuru yatunguranye yakiriwe mu buryo butandukanye cyane ko aribwo bwa mbere igikorwa nk’icyo cyari kibereye muri Kigali Arena, biba akarusho ko cyahuriranye n’ibikorwa bisoza umwaka w’imikino wa Basketball, byabimburiwe n’umukino wa BK All-Star wahuje abakinnyi bitwaye neza.

Yaherekejwe n’amagambo atandukanye y’abakunzi ba Basketball n’Abanyarwanda bakunda imikino muri rusange.

Mu butumwa bwaryo Ishyirahamwe ry’Umukino wa Basketball (FERWABA) ryatangaje ko bidakwiye guterera ivi cyangwa gusabira umukunzi wawe ko muzabana ku bibuga bya Basketball kuko binyuranyije n’amategeko agenga uyu mukino nk’ababigize umwuga.

Rukundo Fabrice yari umwe mu bakinnyi barushanwaga gutsinda amanota mu buryo bwa dunk.

Ubwo yari agiye gukina, hazanwe umukunzi we mu kibuga, amutungura atera ivi, amusaba ko yazamubera umugore ndetse na we arabyemera, amwambika impeta.

Iki gikorwa cyatangaje benshi bari bitabiriye ibirori byo gusoza umwaka w’imikino wa 2018/19 muri Basketball y’u Rwanda iterwa inkunga na Banki ya Kigali PLC, aho hanakinwe umukino wa BK All Star.

Ibinyujije ku rubuga rwa Twitter, FERWABA yavuze ko bitemewe guterera ivi ku kibuga cya Basketball kuko binyuranyije n’amategeko.

Iti ”Gusaba umukunzi ko muzabana ni ikintu cyihariye kitakagombye kubera ku kibuga kigezweho cya Basketball. Twifurije aba bakundana guhirwa, ariko amahame ya FERWABA ntiyemera ibyo ari byo byose byabangamira umukino nko gusaba umukunzi ko muzabana cyangwa izindi gahunda z’abantu ku giti cyabo.”

Banki ya Kigali itera inkunga ya Shampiyona ya Basketball mu Rwanda kimwe n’andi marushanwa y’uyu mukino, na yo yavuze ko ishyigikira umukino ugendera ku mategeko kandi icyo iba igamije ari uko Abanyarwanda baryoherwa n’umukino.

Ati ”Muri Banki ya Kigali dushyigikira umukino wa Basketball ugendera ku mategeko n’amabwiriza yashyizweho. Hamwe na FERWABA, ntabwo twareberera ibikorwa byihariye bibangamira amategeko. Turashaka ko Abanyarwanda baryoherwa n’umukino ariko hakurikijwe amabwiriza yashyizweho.”

Uwitwa Makasi Gisa Dylan na we yavuze ko iki gikorwa cyo gutera ivi imbere y’abantu bari buzuye Kigali Arena kitari gikwiye kuko icyari cyajyanye abantu ari ukureba umukino wa BK All Star, atari ukureba abasomana.

Ati ”Biriya byo gusaba kubana byo ntibyemewe no gusomanira hariya mu kibuga, birengagije ko harimo abana batagenewe kubireba, ikindi si ko twese twashakaga kureba imisomyo yabo, twishyuye kureba umukino.”

Nyombayire Patrick na we yavuze ko guterera ivi mu kibuga byari uguha agaciro gake gahunda y’umukino yari yateguwe, yemeza ko hakwiye kubaho ubunyamwuga.

Ati “Yego, biriya nanjye mbifata nk’agasuzuguro bakoreye kiriya gikorwa. Bakora ibijyanye n’ibyifuzo byabo kubatabibasabye kuko biriya sibyo twishyuye kureba. Dukeneye ubunyamwuga.”

Aba ariko ntibabyemeranywaho n’abandi benshi batanze ibitekerezo byabo bagaragaza ko ibyo Rukundo Fabrice yakoze hamwe n’umukunzi we, ari ikintu cyabashimishije cyane mu ijoro ryo ku wa Gatanu.

Meya wa Bugesera, Mutabazi Richard, na we yaragaragaje ko ashyigikiye Rukundo Fabrice kuko yashimishije abari baje kureba umukino wa BK All Star.

Ati ”Umukinnyi ni umufatanyabikorwa w’ingenzi mu bucuruzi bwa siporo, mureke yumve ku byiza bya Kigali Arena. Nyuma ya byose, umukino wa All-Star ni ukwiyerekana kw’abakinnyi beza no gushimisha abitabiye umukino. Uku gutera ivi kwahuje abantu. Komerezaho Rukundo, amahirwe masa.”

Uwitwa Niyonkuru Samuel na we yavuze ko ashyigikiye igikorwa cyakozwe na Rukundo kuko cyamushimishije.

Ati ”Nanjye nshyigikiye iki gitekerezo, kuriya gutera ivi byadukoreye ijoro kabisa. Sinzi impamvu FERWABA yabihagarika kandi twarabyishimiye.”

Uwiyise Ntaheza nk’iwacu kuri Twitter yavuze ko “ Ikibi ari uko byari kubera mu biro bya FERWABA.” Akomeza avuga ko “ Arena ari iyacu nk’Abanyarwanda, ku bw’ibyo FERWAFA ikwiye kugabanya ibikabyo.”

Shema Sixbert yavuze ko FERWABA ko itagakwiye kubigiraho ikibazo kuko byari bimwe mu bigize umukino.

Ati ”Aka ni akumiro. Byari ibigize umukino. Sinabonye muri slum dunk umuntu abanza gutegura aho ari bukorere!! Byari mu bigize dunk kandi twarabyishimiye.”

Gusaba umukunzi ko muzabana (wedding proposal) hakinwa Basketball, si bishya kuko no muri Shampiyona ya mbere ku Isi muri Basketball ya Leta Zunze Ubumwe za Amerika (NBA), usanga bikorwa.

Ubusanzwe imikino ya All Star ikunze kuba ari iyo kwishimisha, nta guhangana gukomeye kuba kurimo ndetse hanaberamo ibikorwa ahanini biba bisa n’ibigamije kuryohereza abawitabiriye.

Si ubwa mbere kandi mu Rwanda umuntu ubarizwa muri Basketball ateye ivi kuko muri Mutarama 2019, ubwo REG BBC na Patriots BBC zakinaga muri Shampiyona, Umutoza wungirije wa APR BBC, Igor Keys Mugisha, yasabye umukunzi we ko bazabana.

Mu mwaka ushize, ubwo u Bwongereza bwari bumaze gutsinda Cameroun amanota 81-54 mu mikino ya Commonwealth yabereye muri Australia, umukinnyi wabwo, Jamell Anderson yasabye umukunzi we, Georgia Jones, ko bazabana ubwo bari bakiri mu kibuga.

Mu 2018 kandi ku mukino wa Philadelphia 76ers na Denver Nuggets, umufana witwa Calel Fox yasabiye umukunzi we, Tayla Peters, ko babana, mu kibuga ubwo barushanwaga gushyira umupira mu nkangara, abakinnyi bagiye mu karuhuko.

Rukundo Fabrice wateraga dunk, yahise apfukama atera ivi muri Kigali Arena
Umukunzi we yaramwemereye, amwambika impeta
Rukundo ahobera umukunzi we wari umaze kumwemerera ko bazabana
Bagwanye mu byano bishyira kera...
Baranasomana bimara akanya../Foto:KT
Abari baherekeje umukobwa, abafataga amashusho n'amafoto bose bagiye mu kibuga/ Foto: KT

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza