Abafana bagiye kuganura Kigali Arena ku mikino irimo uwo REG BBC izisobanuramo na Patriots BBC

Yanditswe na Eric Tony Ukurikiyimfura
Kuya 17 Nzeri 2019 saa 03:43
Yasuwe :
0 0

Kigali Arena ni yo izakira imikino ya nyuma isoza Shampiyona ya Basketball iterwa inkunga na Banki ya Kigali PLC, aho ku wa Gatanu w’iki cyumweru REG BBC na Patriots BBC zizahurira mu mukino wa gatandatu guhera saa 21:00.

REG BBC irabura intsinzi imwe kugira ngo yegukane Igikombe cya Shampiyona, ni nyuma y’uko itsinze imikino 3-2 muri itanu iheruka guhuza amakipe yombi.

Patriots BBC yabujije REG BBC kwegukana igikombe mu mukino wa gatanu wabaye tariki ya 11 Nzeri, irashaka kwisubiza igikombe cya Shampiyona yatwaye mu mwaka ushize.

Kapiteni wayo, Mugabe Aristide yabwiye IGIHE ko gutsinda umukino wa gatanu byabahaye imbaraga n’icyizere cyo gutsinda umukino wa gatandatu, kugira ngo bazakine umukino wa nyuma wazaba ku wa Gatandatu.

Ati ”Gutsindwa imikino itatu yikurikiranya bibaho kuko imikino ya nyuma ya Playoffs ibamo gutungurana kwinshi. Ku mukino wa kane twatsinzwe kubera amakosa twakoze mu minota ya nyuma. Byaduhaye isomo, duhera aho ngaho twikosora bidufasha gutsinda umukino wa gatanu.”

“Hari icyizere byaduhaye ku buryo dushobora gutsinda umukino wa gatandatu maze tukazakina uwa nyuma ku wa Gatandatu. Umukino wo ku wa Gatanu ni wo navuga ko uzaba ukomeye kuri twebwe.”

Umutoza wungirije wa REG BBC, Ngwijuruvugo Richard Patrick yabwiye IGIHE ko bakomeje kwitegura umukino wa gatandatu uzabahuza na Patriots BBC, aho bashaka kuwutsinda bakegukana igikombe bitagombereye ko hakinwa umukino wa karindwi.

Ati ”Intego yacu yaba ari abakinnyi, abayobozi n’abatoza ni ugutsinda umukino wo ku wa Gatanu ku buryo bitadushyira ku gitutu cyo gukina umukino wa karindwi. Bibaho gutsindwa, umukino uheruka waratugoye birangira tuwutakaje, ariko turi kwitegura neza uwo tugiye gukina kandi twizeye ko bizagenda neza.”

REG BBC nitsinda uyu mukino uzaba ku wa Gatanu saa 21:00 izahita yegukana Igikombe cya Shampiyona yaherukaga mu 2017 mu gihe nitsindwa na Patriots BBC, hazitabazwa umukino wa karindwi uzaba ku wa Gatandatu tariki ya 21 Nzeri.

Iyi mikino kimwe n’isoza Shampiyona y’abagore, yose izabera muri Kigali Arena ifite ubushobozi bwo kwakira abantu ibihumbi 10 bicaye neza ndetse ni ku nshuro ya mbere hagiye kubera imikino ya Basketball yishyuwe nyuma y’uko habereye umukino wa 1 ubwo yatahagwa ku mugaragaro mu kwezi gushize.

Mu bagore, APR WBBC na The Hoops zizatangira gukina saa 19:00, aho APR WBBC na yo ishobora kwegukana igikombe mu gihe yatsinda uyu mukino wa gatandatu kuko kugeza ubu iyoboye n’imikino 3-2.

Ishyirahamwe ry’Umukino wa Basketball mu Rwanda (FERWABA) ryatangaje ko kwinjira kuri iyi mikino yombi bizaba ari 1000 Frw na 3,000 Frw.

Patriots BBC yabujije REG BBC gutwara igikombe hakiri kare ubwo yayitsinaga mu mukino wa 5
Amakipe yombi arongera guhurira muri Kigali Arena nk'uko byagenze ku mukino wa 1
APR WBBC imaze gutsinda The Hoops imikino 3-2
Ku nshuro ya mbere Kigali Arena igiye kuberamo imikino yishyuwe
Petit Stade ni yo yari isanzwe yakira iyi mikino ya nyuma, ariko bamwe bakabura aho bicara

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza