Buzangu Mike yagarutse muri Shampiyona y’u Rwanda

Yanditswe na Eric Tony Ukurikiyimfura
Kuya 9 Mutarama 2020 saa 10:14
Yasuwe :
0 0

Ntumba Buzangu Michael ufite izina rikomeye muri Basketball yo mu Rwanda, yagarutse gukina muri Shampiyona, aho yasinye amasezerano y’imyaka ibiri muri IPRC-Kigali BBC.

Buzangu w’imyaka 38 y’amavuko yagarutse muri Shampiyona y’u Rwanda, aho yigeze gukinira amakipe atandukanye arimo APR BBC, Espoir BBC, KBC na CSK BBC.

Yakiniye kandi Ikipe y’Igihugu Nkuru y’Umukino wa Basketball yitabiriye imikino ya “Afro Basket” yabereye i Tripoli muri Libya mu 2009 ndetse n’iyabereye muri Madagascar mu 2011.

Buzangu waherukaga kugaragara mu Rwanda mu mikino yo kwibuka (GMT 2019), akinira Patriots BBC, yavukiye mu Mujyi wa Kinshasa muri Repubulika Iharanira Demokarasi ya Congo tariki 5 Ugushyingo 1982.

Yakiniye amakipe atandukanye yo mu Rwanda arimo APR BBC kuva mu 2007 kugeza mu 2011, ubwo iyi kipe yari ikuyeho gahunda yo gukinisha abakinnyi b’abanyamahanga.

Mu 2011, yaje kwerekeza muri Kigali Basketball Club (KBC), maze muri uwo mwaka ayifasha gutwara igikombe cya shampiyona.

Mu 2013, Buzangu yafashije KBC gusoreza ku mwanya wa kabiri muri Shampiyona ndetse ayihesha kugera ku mukino wa nyuma w’Irushanwa rya “Playoffs”, aho baje gutsindirwa na Espoir BBC yari ifite iki gikombe imikino 3-1.

Muri uwo mwaka wa 2013, Buzangu yaje gutorwa nk’umukinnyi watsinze amanota menshi muri Shampiyona y’u Rwanda (294), ni mu gihe Ngandu Bienvenu wakiniraga Espoir BBC yabaye umukinnyi mwiza wa shampiyona (MVP).

Mu Ugushyingo uwo mwaka, nibwo yashyingiranwe na Sylvie Alonga imbere y’amategeko mu murenge wa Rwezamenyo nyuma yo kumukwa no kumusaba.

Buzangu wari mu bihe byiza, yaje kugirirwa icyizere akinira Espoir BBC mu mikino y’Akarere ka 5 yabereye i Mombasa muri Kenya mu 2014.

Yahise asinya muri CSK ayikinira kugeza mu 2016, hari mbere y’uko yerekeza mu ikipe ya Club Sportif Constantine BBC yo muri Algérie.

Mu 2019, Buzangu yari mu Ikipe ya Patriots BBC yabashije kwegukana umwanya wa kabiri mu irushanwa mpuzamahanga ryo kwibuka “Genocide Memorial Tournament”, aho yaje gutsindwa na REG BBC ku mukino wa nyuma amanota 74-71.

Bazungu yakiniraga Ikipe ya Pemba Warriors Kampala Basketball Team yo muri shampiyona ya Uganda kuva mu 2017 kugeza mu 2019.

Buzangu Mike yasinyiye IPRC-Kigali BBC
Buzangu wakiniye Patriots BBC muri GMT 2019 asatira Boukinda wa Terreur BBC yo muri RDC
Buzangu w'imyaka 38 yashimishije benshi mu mikino ya GMT 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .