BK Preseason: REG BBC yasubiriye Patriots BBC iyitwara igikombe kibanziriza Shampiyona (Amafoto)

Yanditswe na Eric Tony Ukurikiyimfura
Kuya 14 Ukuboza 2019 saa 07:27
Yasuwe :
0 0

Nyuma y’ibyumweru bibiri gusa REG BBC yegukanye irushanwa ry’Agaciro, iyi kipe y’Ikigo cy’Igihugu gishinzwe ingufu yasubiriye mukeba wayo, Patriots BBC, iyitsinda amanota 64-50 ku mukino wa nyuma w’irushanwa ribanziriza Shampiyona ‘BK Preseason’ ryatewe inkunga na Banki ya Kigali PLC.

Uyu mukino wahuje amakipe yombi, wabereye muri Petit Stade i Remera kuri uyu wa Gatanu.

REG BBC itozwa na Mwinuka Henry wavuye muri Patriots BBC ayihesheje ibikombe bitandukanye birimo bitatu bya Shampiyona, yatangiye umukino iri hejuru, itsinda agace ka mbere ku manota 17-11.

Agace ka kabiri, katangiye Patriots BBC yinjizamo Ruzigande Ally mu mwanya wa Makiadi Michael mu gihe Nshobozwabyosenumukiza Wilson na Kaje Elie na bo bagiyemo ku ruhande rwa REG, ndetse bazamura ikinyuranyo kigera ku manota 10 (11-21).

Umukinnyi mushya wa Patriots BBC, Mukama Victor wanakinnye iminota myinshi (27:36) kurusha abandi bagenzi be, yafashije ikipe ye kugabanya ikinyuranyo, atsinda amanota atanu mu gihe aka gace karangiye harimo ikinyuranyo cy’amanota atandatu (18-24).

REG BBC yongeye kugaragaza ikinyuranyo mu gace ka gatatu, igatsinda ku manota 18-10 mu gihe mu ka kane, amakipe yombi yagaragaje guhangana, atsindamo amanota 44, arimo 22 kuri buri imwe ndetse umukino urangira harimo ikinyuranyo cy’amanota 14 (50-64).

Mukengerwa Benjamin wa REG BBC yatsinze amanota 21 muri uyu mukino, Ngandu Bienvenu atsinda 15, Kami Kabange 12 mu gihe ku ruhande rwa Patriots, Ndizeye Dieudonné yatsinzemo 16 naho Nijimbere Guibert atsindamo 10.

Patriots BBC yifashishije uyu mukino wa nyuma mu kwitegura imikino y’jonjora rya kabiri rya Basketball Africa League (BAL 2020) izaba hagati ya tariki ya 17 na 22 Ukuboza 2019 muri Kigali Arena.

Abatoza b’iyi kipe bahaye umwanya wo gukina abakinnyi bose, aho Ishimwe Didier wakinnye iminota itanu na Mugabe Aristide wakinnye umunani, ari bo bakinnye iminota iri munsi ya 12 mu bakinnyi 12 bitabajwe kuri uyu mukino.

Undi mukino wabaye kuri uyu wa Gatanu, mu bagore, The Hoops yatsinze Ubumwe amanota 56-45.

Kuri uyu wa Gatandatu, abagore barongera bakine, Ubumwe ihure na RP IPRC Huye WBBC guhera saa 15:00 muri Petit Stade mu gihe APR WBBC ikina na The Hoops guhera saa 17:00.

Banki ya Kigali yatangiye gutera inkunga Shampiyona ya Basketball guhera mu mwaka ushize w’imikino. Iy’uyu mwaka w’imikino izatangira muri Mutarama 2020.

Nshizirungu Patrick abuza Ndizeye Dieudonne gutanga umupira
Ruzigande Ally ari mu bakinnyi ba Patriots BBC batakinnye iminota myinshi muri uyu mukino
Kami ashaka uko ashyira umupira mu nkangara, Ndizeye Dieudonne agerageza kumuhagarika
Mukengerwa Benjamin wa REG BBC ni we mukinnyi watsinze amanota menshi muri uyu mukino
Kami Kabange yitegura gutsinda amanota
Mukengerwa Benjamin wa REG BBC azamukana umupira mu gihe Nijimbere Guibert yari yiteguye kumuhagarika
Nyuma y’ibyumweru bibiri gusa REG BBC yegukanye irushanwa ry’Agaciro, ikipe ya Sosiyete y’Igihugu ishinzwe ingufu yasubiriye mukeba wayo, Patriots BBC, iyitsinda amanota 64-50 ku mukino wa nyuma w’irushanwa ribanziriza Shampiyona ‘BK Preseason’ ryatewe inkunga na Banki ya Kigali PLC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza