BK Preseason: REG BBC na Patriots BBC zatsindiye guhurira ku mukino wa nyuma

Yanditswe na Eric Tony Ukurikiyimfura
Kuya 13 Ukuboza 2019 saa 09:45
Yasuwe :
0 0

Amakipe ya REG BBC na Patriots BBC amaze kugaragaza ko ari ku rwego rwisumbuye ugereranyije n’ayo bihanganye, ni yo yatsindiye gukina umukino wa nyuma w’irushanwa ribanziriza Shampiyona ya Basketball y’umwaka utaha, ryatewe inkunga na Banki ya Kigali PLC "BK Preseason"’, uteganyijwe kuri uyu wa Gatanu.

REG BBC na Patriots BBC zabigezeho nyuma yo kwitwara neza mu mikino ya ½ yabaye kuri uyu wa Kane muri Petit Stade Amahoro i Remera.

Mu mukino wabanje saa 19:00, Patriots BBC yahuye na Espoir BBC zari kumwe mu itsinda rya mbere, maze iyitsinda ku nshuro ya kabiri amanota 89-63.

Patriots BBC yagaragaje urwego ruri hejuru mu gace ka mbere, igatsinda ku manota 23-7 mu gihe Espoir BBC na yo yayihindukanye, itsinda aka kabiri kuri 25-17, amakipe yombi ajya kuruhuka harimo ikinyuranyo cy’amanota umunani (40-32).

Agace ka gatatu karangiye Patriots izamuye ikinyuranyo, kigera ku manota 17 (64-47) mu gihe umukino warangiye hagezemo ikinyuranyo cy’amanota 26 (89-63).

Mukama Jean Victor uheruka gusinyira Patriots BBC avuye muri Canada, ni we watsinze amanota menshi muri uyu mukino (23) mu gihe Kasasa Bobo wa Espoir BBC yatsinzemo 17.

Uyu mukino wakurikiwe n’uwo REG BBC yatsinzemo APR BBC amanota 77-70, wo watangiye saa 21:00.

Nubwo APR BBC yatsinze agace ka mbere ku manota 20-17, amakipe yombi yagiye kuruhuka REG BBC yashyizemo ikinyuranyo cy’amanota atandatu nyuma yo gutsinda agace ka kabiri ku manota 21-12.

REG BBC yatsinze agace ka gatatu ku manota 20-19 mu gihe mu gace ka kane, kasoje umukino, buri kipe yatsinzemo amanota 19, hagumamo ikinyuranyo cy’amanota arindwi (77-70).

Sangwe Armel yatsindiye APR BBC amanota 23 muri uyu mukino mu gihe Beleck Bell wa REG BBC, we yatsinzemo amanota 15.

Kuri uyu wa Gatanu irushanwa rirakomeza mu cyiciro cy’abagore, aho The Hoops ikina na Ubumwe WBBC saa 18:00 mu gihe umukino wa nyuma mu bagabo uba guhera saa 20:00 muri Petit Stade hagati ya REG BBC na Patriots BBC.

Kwinjira kuri iyi mikino yombi ni 1000 mu myanya isanzwe na 3000 Frw mu myanya y’icyubahiro.

Ejo ku wa Gatandatu, abagore bazongera bakine, Ubumwe ihure na RP IPRC Huye WBBC guhera saa 15:00 muri Petit Stade mu gihe APR WBBC izakina na The Hoops guhera saa 17:00.

Banki ya Kigali yatangiye gutera inkunga Shampiyona ya Basketball guhera mu mwaka ushize w’imikino, aho iy’uyu mwaka w’imikino izatangira muri Mutarama 2020.

Ndizeye Dieudonne na Kasongo Junior bashaka uko bahagarika Irumva Hertier wa Espoir BBC
George Wilbert wa Patriots BBC agerageza guhagarika Kubanatubane Philippe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza