BK Basketball NL: Patriots BBC yizeye gutsinda REG BBC ikayibuza kwegukana Igikombe cya Shampiyona

Yanditswe na Eric Tony Ukurikiyimfura
Kuya 9 Nzeri 2019 saa 03:21
Yasuwe :
0 0

REG BBC irabura intsinzi imwe ikegukana Igikombe cya Shampiyona ya Basketball iterwa inkunga na Banki ya Kigali PLC, ni nyuma y’uko kuri ubu iyoboye n’intsinzi 3-1 mu mikino ya nyuma ikomeje kuyihuza na Patriots BBC muri shampiyona y’abagabo.

Umutoza wa Patriots BBC, Henry Mwinuke yizeye ko ikipe ye izatsinda umukino wa 5 uzaba kuri uyu wa Gatatu kugira ngo yongere kugaruka neza mu irushanwa.

Umukino wa kane wahuje amakipe yombi ku wa Gatanu, warangiye REG BBC itsinze amanota 63-62 maze biyongerera amahirwe menshi yo kwegukana Igikombe cya Shampiyona yaherukaga mu 2017.

Patriots BBC ifite igikombe cya Shampiyona y’umwaka ushize w’imikino, yatsinze umukino wa mbere wahuje amakipe yombi ku manota 67-58 mu ntangiriro z’ukwezi gushize.

REG BBC yahise ikora impinduka, izana umutoza mushya w’umunya-Serbia Igor Kovacevic wasimbuye Umurundi Ngwijuruvugo Richard Patrick ndetse yatsinze imikino itatu yakurikiyeho.

Iyi kipe ifite amahirwe menshi yo kwegukana Igikombe yaherukaga mu 2017 ndetse ishobora kubigeraho kuri uyu wa Gatatu ubwo amakipe yombi azaba ahurira mu mukino wa 5 uzatangira saa 21:00.

Muri iyi mikino ya nyuma iganisha ku gikombe, amakipe atanguranwa intsinzi nyinshi mu mikino irindwi.

Umutoza wa Patriots BBC, Henry Mwinuke avuga ko bitararangira kuko yizeye ko ikipe ye itsinze uyu mukino wo ku wa Gatatu, yaba igifite amahirwe yo guhatanira igikombe.

Ati” Uretse ko REG BBC yahinduye umutoza, nta zindi mpinduka yakoze muri iyi mikino. Baratugoye ariko nizeye ko umukino utaha tuzabatsinda kuko ubona ko badutsinda bashingiye ku makosa yacu tuba twakoze. Igikombe ntabwo turagitakaza, nidutsinda ku wa Gatatu bizadusubiza mu mukino ariko nidutsindwa nyine bizaba birangiye.”

Mu cyiciro cy’abagore na bo bazakina umukino wa 5 kuri uyu wa Gatatu saa 19:00, APR WBBC iranganya imikino 2-2 na The Hoops.

REG BBC na Patriots BBC zigiye guhurira mu mukino wa 5 kuri uyu wa Gatatu
Patriots BBC ifite igikombe giheruka, yatsinze umukino umwe mu mikino 4 ya nyuma imaze gukinwa
REG BBC iyoboye imikino ya nyuma n'intsinzi 3-1 ndetse ishobora kwegukana Igikombe cya Shampiyona kuri uyu wa Gatatu
Henry Mwinuke utoza Patriots BBC asanga umukino wo ku wa Gatatu ushobora guhindura byinshi
Igor Kovacevic utoza REG BBC, yayifashije gutsinda imikino itatu iheruka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza