Iyi mikino yatangiye gukinirwa i Dakar muri Sénégal ahahuriye itsinda rya mbere n’irya gatatu.

Umukino w’u Rwanda na Sénégal watangiye wegeranye cyane, amakipe yombi atsindana abifashijwemo na William Robynes na Brancou Badio.

Agace ka mbere karangiye Sénégal iyoboye umukino n’amanota 20 kuri 17 y’u Rwanda.

Mu gace ka kabiri, iyi kipe iri mu rugo yatangiye kuzamura ikinyuranyo kubera amanota menshi yatsindwaga na Amar Sylla na Moustapha Diop.

Muri aka gace, u Rwanda rwakoraga amakosa menshi ndetse ntirunatsinde ’lancer franc’ rwahabwaga. Rwagatsinzemo amanota 14 kuri 23 ya Sénégal.

Igice cya mbere Sénégal iyoboye umukino n’amanota 43 kuri 31.

Umukino wakomeje kugenda muri uwo mujyo kuko u Rwanda rwarushwaga cyane, abarimo Youssou Ndoye na Lamine Sambe barushaho kongera ikinyuranyo.

Aka gace u Rwanda rwagakinnye nabi kuko rwagatsinzemo amanota 10 gusa kuri 21. Ibi byatumye karangira ikinyuranyo kiyongereye cyane kiba amanota 23 (64-41).

Mu gace ka nyuma umukino watuje, Sénégal ihindura abakinnyi bityo ntiyongera gutsinda amanota menshi, amakipe yombi agatsindamo 17.

Umukino warangiye Ikipe y’Igihugu ya Sénégal yatsinze iy’u Rwanda amanota 81 kuri 58 y’u Rwanda itangirana intsinzi muri iri rushanwa.

Brancou Badio na Youssou Ndoye nibo batsinze amanota menshi muri uyu mukino (14), mu gihe Williams Robynes yatsinze 12 ku rundi ruhande.

U Rwanda ruzakina umukino wa kabiri ku wa Gatandatu, saa 23:00 ubwo ruzahangana na Cameroun, mbere yo gusoza imikino rukina na Gabon ku Cyumweru.

U Rwanda rwatangiye nabi imikino yo gushaka itike y’Igikombe cya Afurika

Sénégal yatangiye yitwara neza imbere y’abafana bayo

Gutaha Cadeau ashaka uko atanga umupira

Antino Jackson yakinnye umukino wa mbere mu Ikipe y’Igihgu

Antino Jackson ahanganye na Jean Jacques Boissy

Shema Osborn agerageza gutsinda

Abafana ba Sénégal bashyigikira ikipe yabo bikomeye

Manzi Kenny wakinnye umukino we wa mbere mu Ikipe y’Igihugu azamukana umupira

Shema Osborn ahanganye na Youssou Ndoye