Kuri iyi nshuro, ntabwo iyi kipe irimo amasura mashya menshi kuko Ishimwe Lars uherutse kwerekeza muri Tigers BBC ariwe wenyine urimo mushya.

Ni mu gihe abahamagawe ku nshuro ya kabiri ari Antino Jackson wa APR BBC na Shema Bruno wa Tigers BBC.

Mu basanzwe hagaragaramo Ntore Habimana na Axel Mpoyo ba APR BBC batitabiriye ubutumire buheruka kubera ko bari mu biruhuko.

Uretse aba, abandi bahamagawe ni Kapiteni Ndizeye Dieudonné wa MAS Basketball yo muri Maroc, Hagumintwari Steven na Furaha Cadeaux de Dieu ba Patriots, Muhizi Prince wa REG BBC na Bigirumwami Noah.

Hari kandi William Robynes, Nshobozwabyosenumukiza Jean Jacques Wilson na Shema Osborn ba APR BBC.

Iyi mikino y’ijonjora rya nyuma ryo gushaka itike y’Igikombe cya Afurika izabera i Rabat muri Maroc kuva tariki 21 kugeza ku wa 23 Gashyantare 2025.

U Rwanda ni urwa gatatu mu Itsinda C n’amanota ane, aho amakipe abiri ya mbere ari Sénégal na Cameroun, mu gihe Gabon iri ku mwanya wa nyuma.

Ikipe y’Igihugu izatangira umwiherero ku wa Mbere, tariki 10 Gashyantare, mu gihe izerekeza muri Maroc ku wa Gatanu, tariki 14 Gashyantare 2025.

Iyi mikino iri gukinwa mu matsinda atanu agizwe n’amakipe ane. Muri iyi mikino buri kipe izahura n’indi, atatu ya mbere azabone itike y’Igikombe cya Afurika kizabera muri Angola tariki 12 kugeza ku wa 24 Kanama 2025.

Ishimwe Lars uherutse kwerekeza muri Tigers BBC avuye muri Canada, yahamagawe bwa mbere

Axel Mpoyo utaritabiriye ubutumire buheruka, yongeye guhamagarwa

Ntore Habimana utaritabiriye ubutumire buheruka, yongeye guhamagarwa

Shema Bruno ni umwe mu bari kwitwara neza muri Tigers aheruka kwerekezamo

Ikipe y'Igihugu izatangira umwiherero ku wa Mbere, tariki 10 Gashyantare